Sämitige stivra kiäsá maassâd OA:ij olmoošvuoigâdvuotâkomiteai toohâm vaidus
Sämitige stiivrâ puoh jesâneh vaidii Säämi aalmug jiešmeridemvuoigâdvuođâ uđđâ luávkkáámist, ko AHR komettij ive 2023 sämitiggevaaljâi puáttus já meridij uđđâ vaaljâid. Tääl stivrâ lii almottâm ON:ij olmoošvuoigâdvuotâčäällimkoodán, ete kiäsá vaiduu maassâd.
Kuhháá vuordum sämitiggelaavâ nubástus puátá vuáimán 1.8.2025. Uđâsmittem mield Suomâ tuubdâst meiddei siskáldâs lahâaasâtmist Säämi aalmug jiešmeridemvuoigâdvuođâ. Jiešmeridemvuoigâdvuođâ olášuttem nannejuvvoo eereeb iärrás pyereedmáin sämmilij já virgeomâhái koskâsijd ráđádâllâm- já ohtsâštoimâmmonâttâlmijd almugijkoskâsávt vuáhádum rijjâ, muuneeld adelum já tiätun vuáđuduvvee miettâm prinsiip vuoiŋâst. Sämitige vaaljâi jienâvuoigâdvuođâ já valjâtohálâšvuođâ kritereh tivoduvvojeh sämmilij jiešmeridemvuoigâdvuođâ kunnijâtmáin já viijmâg tivomáin almugijkoskâsávt kavnâttum olmoošvuoigâdvuotâluávkkáámijd. Puátteevuođâst máhđuliih jienâvuoigâdvuotân kyeskee sierâmielâlâšvuođah puátih vuáđudemnáál uđđâ sorjohánnáá já äššitobdee nubástusuuccâmlävdikode meridemnáál siämmást, ko alemus haldâttâhriehti siäilu laavâst tuše väidimlove peht.
Sämitiggeest lii lyettivâš já huksejeijee tolâdume uđâsmittum laavâ olášutmân já osko, ete tot nannee sämmilii algâaalmug máhđulâšvuođâid piäluštiđ já ovdediđ kulttuuris, kielâs, iäláttâsâidis já vuoigâdvuođâidis, meiddei enâmân já luánduriggoduvváid čyeccee vuoigâdvuođâid. Uđâsmittum laahâ meerhâš Suomâ staatâ já sämmilii algâaalmug koskâsii siärvádâhsopâmuš peividem mii ääigi hástusij já almugijkoskâsii ovdánem vuáđuld.
Sämitigge kijttá täsivääldi president, ovdâskode, lahânubástus oovdân toimâm haldâttâsâid sehe puoh sämmilijd já syemmilijd, kiäh láá mietivaiguttâm čuávdus šoddâmân.
Sämitige tâi ton stiivrâ jesâneh teikâ sämitiggevaaljâin iävtukkâssân lamaš ulmuuh láá toohâm maaŋgâid almugijkoskâsijd olmoošvuoigâdvuotâvaiduid puáris laavâ tovâttem olmoošvuoigâdvuotâluávkkáámijn. Ive 2018 siiviil- já pooliitláid vuoigâdvuođáid kyeskee almossopâmuš koccee OA:ij olmoošvuoigâdvuotâkomitea já ive 2022 OA:ij näliolgoštem vuástásâš komitea kuábáš-uv kavnâttáin, ete Suomâ lâi luávkkám áášánkullee olmoošvuoigâdvuotâsopâmušâid ive 2015 sämitiggevaljáid kyeskee alemuu haldâttâhrievti miärádâsâi peht. Ko laahâ ij tivodum, meiddei ivij 2019 já 2023 sämitiggevaljáid kyeskee AHR miärádâsâin láá tohhum uđđâ olmoošvuoigâdvuotâvaiduuh.
Ko AHR komettij ive 2023 sämitiggevaaljâi puáttus já meridij uđđâ vaaljâid toimâttemnáál, Sämitige stiivrâ puoh jesâneh vaidii OA:ij olmoošvuoigâdvuotâkomitean ääšist Säämi aalmug jiešmeridemvuoigâdvuođâ uđđâ luávkkáámin (OA-vaaidâ nr 4629/2024). Ko sämitige toimâulmuid čuoccâm rikostutkâm lii maŋa lopâttum ášáskuttee 7.5.2025 adelem miärádâssáin agâttemmin, já ko täsivääldi president lii 27.6.2025 nonnim ovdâskode tuhhiittem sämitiggelaavâ tivomijd puáttiđ vuáimán 1.8.2025, tai olmoošvuoigâdvuotâvaidui tahheeh láá onne almottâm OA:ij olmoošvuoigâdvuotâčäällimkoodán, ete sij keesih vaiduu maassâd. Almottâs vaiduu maassâdkesimist vuolgâttui Genevest čokânâm OA:ij olmoošvuoigâdvuotâkomitea čuákkimân, mii nohá onne 17.7.
Sämitige stivrâ tuáivu huksejeijee ohtsâšpargo syemmilij statâorgaanijguin já virgeomâháiguin.
Lasetiäđuh:
Tuomas Aslak Juuso
Saavâjođetteijee sajasâš
040 687 3394
tuomas.juuso@samediggi.fi
