Sämitigge já máttááttâs- já kulttuurministeriö tuálvuškyetih sämimáttááttâs ovdedempargojuávhu toimâiävtuttâsâid ovdâskulij

Teivâdmist tubdâstii táárbu uáiniđ já nanodiđ sämmilij škovlimpálgá olesvuottân. Lasseen teivâdmist pahudui, ete ovdedempargojuávhu toimâiävtuttâsâin láá stuárráábeh koččâmušah, moh väätih ruttâdemmiärádâsâi já lahâasâttem tarkkum, já meid sämikielâlii já sämikielâi máttááttâs ovdedemtooimah, maid puáhtá älkkeebeht olášuttiđ pehtilub informaatiojyehim peht já aktiivlii viärmádâhpargo peht. Teivâdmist soppui meid jotkâpargo häämist.

– Sämitigge kijttá kansliahovdâ Anita Lehikoisii sämimáttááttâs ovdedem tehálâšvuođâ vuotân väldimist. Ohtsâš ibárdâs sämimáttááttâs tiileest lii ovdâsaajeest merhâšittee vâi aašijd puáhtá tuálvuđ ovdâskulij. Čuávuvâžžân ličij-uv tárguttâs karttiđ oovtâst puátteevuođâ laavhijd tooimâin, iätá Sämitige saavâjođetteijee sajasâš Tuomas Aslak Juuso.

Sämitiggeest teivâdmân uásálistii saavâjođetteijee sajasâš Tuomas Aslak Juuso, škovlim- já oppâmateriaallävdikode saavâjođetteijee Anni Koivisto, škovlimčällee Bigga-Helena Magga já lahâčällee Kalle Varis. Káidusohtâvuođâ peht pääihi alne lijjii kielâtorvočällee Anne Kirste Aikio, oppâmateriaalčällee Petra Kuuva, kielâpiervâlstivrejeijee Niina Aikio-Siltala já káidusmáttááttâs piiloothaavâ koordinaattor Anne Olli. Máttááttâs- já kulttuurministeriöst pargo stivree kansliahovdâ Anita Lehikoinen. Suu pargojuávhust lijjii máttááttâsräđiolmooš Jari Rajanen, máttááttâsräđiolmooš Marjo Vesalainen, máttááttâsräđiolmooš Kirsi Alila, spesiaalvuávájeijee Mikko CortésTèllez já sierânâsäššitobdee Sini Keinonen.

Ovdedempargojuávkku raahtij vijđes čielgiittâs sämikielâi já sämikielâlii máttááttâs tiileest. Pargojuávkku tarkkui sämikielâlii arâšoddâdem, sämmilij kulttuur- já kielâpiervâltooimâ, sämimáttááttâs já –škovlim tile olesvuottân. Tot almostitij ive 2021 raapoort, mast lijjii toimâiävtuttâsah tile pyeredem várás.

Pargo ääigi ráhtojii meid nelji sierânâsčielgiittâs máttááttâs- já arâšoddâdempargei finnimvuođâst já škovlimpálgáin já meid sosiaal- já tiervâsvuođâsyergi pargei škovlim tiileest já sämikielâlij oppâmateriaalij tiileest já táárbuin sehe sämmilâštiäđust oppâmateriaalijn.

Sämitige saavâjođetteijee sajasâš, škovlim- já oppâmateriaalsektor ovdâsvástádâssaavâjođetteijee Tuomas Aslak Juuso já máttááttâs- já kulttuurministeriö kansliahovdâ Anita Lehikoinen soováin teivâdmist juovlâmáánust 2024, ete algâttuvvoo ovdedempargojuávhu toimâiävtuttâsâi karttimpargo, mon ulmen lii algâttiđ aktiivlii porgâm toimâiävtuttâsâi olášuttem várás.

• Máttááttâs- já kulttuurministeriö almostitmeh 2021:25, Sämikielâi já sämikielâlii máttááttâs ovdedempargojuávhu raapoort

Lasetiäđuh

Tuomas Aslak Juuso
Saavâjođetteijee sajasâš
040 687 3394
tuomas.juuso@samediggi.fi 

Bigga-Helena Magga
Škovlimčällee
040 570 2786 / 010 839 3121
bigga-helena.magga@samediggi.fi