Sämitigge almostit ravvuu vaanhimáid sämmilii arâšoddâdmân ucâluumeest
Sämitigge lii ráhtám vaanhimáid čujottum uánihis ravvuu sämmilii arâšoddâdmân ucâluumeest. Ravvuu ulmen lii jyehiđ tiäđu sämmilii arâšoddâdem kyevti toimâhäämi iäruin sehe párnáá vuoigâdvuođâst sämmilii arâšoddâdmân.
Kove: Ville Fofonoff / Saamelaiskäräjät
Ravvuid láá käibidâm kieldâin eromâšávt tondiet, ete teháliih iäruh sämikielâ eenikiellân sárnoo párnái arâšoddâdem já kielâpiervâlij kooskâst liččii čielgâsávt kavnâmist oovtâ saajeest.
– Raavâ lii uánihâš já vuáju vuáđuaššijd. Lii tiäđust-uv máhđuttem čokkiđ siämmáá ääigi uánihávt já nuuvt vijđáht ko máhđulâš puoh aašijd, moh lohtâseh sämmilii arâšoddâdmân, mutâ tuáivu mield vaanhimeh kävnih ravvuu já tast lii iše sämmilii arâšoddâdmân ucâluumeest, iätá kielâpiervâlstivrejeijee Niina Aikio-Siltala.
Raavâ lii uási stuárráb olesvuođâst, mon ulmen lii ohtâlistiđ sämmilii arâšoddâdem metodijd já älkkeedittiđ sehe arâšoddâdem uárnejeijei já arâšoddâdem pargei pargo. Olesvuotân kulá meid kieldâi kiävtun uáivildum raavâ savâstâlmist, mon kalga toollâđ ovdil ko mieđetteh saje sämmilii arâšoddâdmân. Kuohtuuh ravvuuh láá rahtum kieldâi tuoivuu mield.
Ko peerâ ocá saje sämmilii arâšoddâdmist, te perruin tuálloo savâstâllâm, mon ulmen lii kavnâđ eidu jieijâs perrui hiäivulâš arâšoddâdempalvâlus.
– Taat vyehi lii lamaš kiävtust jyehi kieldâst ovdil-uv, mutâ tääl kiävtun puátá siämmáš vuáđu savâstâlmân já tienuuvt siskáldâs lii puoh kieldâin siämmáálágán. Savâstâllâm tuálloo ovdil arâšoddâdemsaje mieđettem, vâi perruu palvâlemtáárbust finnee pyere kove jo ovdil arâšoddâdem algâttem, iätá Aikio-Siltala.
Kuálmád olesvuottân Sämitigge ráhtá sämmilii arâšoddâdem pedagogisijd linjiimijd. Linjiimeh tuáimih eromâšávt sämmilii arâšoddâdem pargei toorjâmaterialin já toi ulmen lii jieijâs uásild ohtâlistiđ sämmilii arâšoddâdem pedagogiik puoh ohtâduvâin.
Lasetiäđuh
Niina Aikio-Siltala
Kielâpiervâlstivrejeijee
040 487 5414 / 010 839 3115
niina.aikio-siltala@samediggi.fi
