Sämitigge iävtut jesânijd uđđâ nubástusuuccâmlävdikoodán - lävdikode saavâjođetteijen iävtuttuvvoo Oula-Antti Labba
Sämitigge iävtut staatârááđán, ete nubástusuuccâmlävdikode saavâjođetteijen nomâttuvvoo Oula-Antti Labba. Uálgitoimâsâžžân lahâolmoošjesânin iävtuttuvvoo Piia Nuorgam já äššitobdeejesânin Juha Guttorm já Marko Tervaniemi. Lahâolmoošvärijesânin iävtuttuvvoo Anni-Kristiina Juuso já äššitobdeevärijesânin Rauna Rahko-Ravantti já Joni Gauriloff. Sämitigge meridij ääšist čuákkimstis 26.2.2026.
Nubástusuuccâmlävdikodde lii jiečânâs já jiešmerideijee toimâorgaan, mii kieđâvuš vuossâmužžân nubástusuuccâmtäässin Sämitiggeest adelum laavâ 26 § miäldásijd valjâluvâttâlmân väldimân já tast meddâlistmân kyeskee aašijd. Staatârääđi aasât nubástusuuccâmlävdikode kuuđâ ihán häävild Sämitige iävtuttâsâst.
Nubástusuuccâmlävdikode saavâjođetteijee já lahâolmoošjeessân kolgâv tevdiđ tuámustovlilaavâ (673/2016) 10 lovo 1 § 1 momentist asâttum tuámmár almolijd tohálâšvuođâvátámâšâid. Eres jesânijn váttoo rievtismielâlâšvuotâ, uápásmem lävdikode toimâsuárgán já pargo hoittáámân tárbuliih persovnliih jiešvuođah.
Jesâneh iä taarbâš leđe merkkejum Sämitige valjâluvâttâlmân, mutâ sij iä pyevti leđe Sämitige tâi valjâlävdikode jesâneh tâi värijesâneh iäge Sämitige palvâlusâst. Lävdikode jesâneh já värijesâneh iä meid pyevti leđe iävtukkâssân Sämitige vaaljâin, já sij kalgeh almottiđ čonâlâsvuođâs laavâ vaattâm vuovvijn riehtiministeriön já nubástusuuccâmlävdikoodán.
Sämitige čuákkim iävtut lasseen staatârááđán, ete koččâmuš nubástusuuccâmlävdikode saavâjođetteijee váldutoimâsâšvuođâst tâi uásiáigásâšvuođâst sirduuččij lävdikode jieijâs čuávdimnáál ton orniistâllâm ooleest vâi visásmittoo lävdikode jiečânâsvuotâ já jiešráđálâšvuotâ.
Lasetiäđuh:
Tuomas Aslak Juuso
Saavâjođetteijee sajasâš
040 687 3394
tuomas.juuso@samediggi.fi
