Sämitigge já Iänuduv kieldâ ovdedii vuáruvaikuttâs oovtâstpargoteivâdmist
Sämitigge já Iänuduv kieldâ čokkânii ohtsii oovtâstpargopiäiván Hettaast. Teivâdmist lâi pyeri savâstâllâm já kieđâvuššii maaŋgâid kuohtuid uásipeelijd tehálijd teemaid oovtâstpargo ovdedem várás.
Iänuduv kieldâhovdâ Eero Ylitalo ja Sämitige saavâjođetteijee sajasâš Tuomas Aslak Juuso.
Iänuduv kieldâ já Sämitige ovdâsteijeeh teivâdii Hettaast Iänuduv kieldâtáálust koskoho 1.4.2026. Teivâdem ulmen lâi oovtâstpargo ovdedem já ohtsij hiäđukocceem čuosâttuvâi kavnâm. Ohtâsâžžân hiäđukocceem teeman pajedii ei. Laapi pyereestvaijeemkuávlu palvâlusâi turvim, Säämi kielâlaavâ 31 § miäldásii torjuu nanodem sehe meccikirdemij turvim ovdedem. Lasseen onnii tehálâžžân sämikielâlii nuorâitooimâ ovdedem Iänuduvâst.
Peeivi ääigi kieđâvuššii meid eres äigikyevdilijd aašijd, tego sämmilij vuoigâdvuođâid já šiev aalmugkoskâvuođâid, nuorâi aašijd, eennâmkevttim- já iäláttâsaašijd, mađhâšemaašijd, sosiaal- já tiervâsvuotâaašijd, sämikielâlii arâšoddâdem já eres kielâ- já škovlimaašijd. Tilálâšvuođâst savâstâllii meid ohtsii hiäđukocemist já puáttee vuáruvaikuttâs pyereedmist.
– Peivi lâi maaŋgâ náál ávhálâš. Tot adelij pyere máhđulâšvuođâ rijjâ savâstâlmân já addiittâllâm naanoodmân, kieldâhovdâ Eero Ylitalo iätá.
– Eromâš merhâšittee peivi lâi meid munjin persovnlávt. Mun lam puáttám paargon eres kuávlust, já sämikuávlu kieldâ jođettem lii munjin uđđâ olesvuotâ, Ylitalo juátká.
– Lâi tehálâš kuullâđ uáinuid tast, maid miärádâsâi valmâštâlmist kalga väldiđ vuotân. Tai aašij iberdem lii iähtu ovdâsvástádâslii já kilelis miärádâstohâmân.
Ylitalo mield oovtâstpargo merhâšume tiäduttuvvoo meid hiäđukocemist. – Mun anam tehálâžžân, ete mij ovdánep hiäđukocemist oovtâst. Ohtsâš sunde já oovtâstpargo láá puohâi hiätu, sun paahud.
– Rijjâ já ovdedeijee savâstâllâm lii tehálâš, vâi mij pyehtip kavnâđ ohtsijd čuávdusijd já nanodiđ oovtâstpargo. Teivâdem Iänuduv kieldáin adelij máhđulâšvuođâ kieđâvuššâđ kuohtuid tehálijd teemaid já tärkkilistiđ ohtsijd uulmijd. Oovtâstpargo juátkim lii kuávdášlâš sämmilij vuoigâdvuođâi já šiev aalmugkoskâvuođâi oovdedmân kuávlust, iätá Sämitige saavâjođetteijee sajasâš Tuomas Aslak Juuso.
Teivâdmân uásálistii Iänuduv kieldâst sehe luáttámušolmooš- já virgehaldâšeijeeornijdume alemuuh njunošeh.
Saavâ teivâdmist jođettij váldustiivrâ saavâjođetteijee Jarmo Näkkäläjärvi.
– Teivâdmist lâi eromâš pyeri vuoiŋâ, já savâstâlmij mield mij kaavnâim maaŋgâid aašijd, maid ovdediđ oovtâst, muštâl Näkkäläjärvi.
Sämitiggeest pääihi alne teivâdmist lâi saavâjođetteijee sajasâš Tuomas Aslak Juuso. Káidusohtâvuođáin uásálistii Sämitige sierâ toimâsuorgij virgeulmuuh.
Lasetiäđuh
Iänuduv kieldâ
Eero Ylitalo
HTM kieldâhovdâ / kieldâneuvos
040-5704073
eero.ylitalo@enontekio.fi
Sämitigge:
Tuomas Aslak Juuso
Saavâjođetteijee sajasâš
040 687 3394
tuomas.juuso@samediggi.fi
