Sämitigge ocá meriáigásii vuávájeijee almoshaldâttâhân
Sämitigge almoot uuccâmnáál meriáigásii haldâttâhvuávájeijee pargo.
Vuávájeijee pargoid kuleh almoshaldâttuv išedeijee pargoh ei. Sämitige ravvui já njuolgâdusâi peividem- já vuávámpargoh já tom visásmittem, ete toh láá ääigitääsist, já meid valmâštâlmist išedem. Pargo stivrejeijen já aldahovdân tuáimá Sämitige haldâttâhhovdâ.
Palvâluskoskâvuođâ tiäđuh
Pargo álgá sopâmuš mield nuuvt jotelávt ko máhđulâš. Meriáigásâš palvâluskoskâvuotâ pištá käävci mánuppaijeed. Máhđulii joođhâst suáppoo sierâ. Virgekoskâvuođâ tevdimist nuávdittuvvoo kuulmâ mánuppaje keččâlemäigi.
Vuávájeijee pargo lii Sämitige almos toimâttuvâst. Pargosaje lii Anarist, Säämi kulttuurkuávdáš Sajosist. Káiduspargo lii uásild máhđulâš.
Occest mij vyerdip
Tohálâšvuođâiähtun lii pargo vaattâm hiäivulâš škovlim já sämikielâ táiđu (asâttâs 1727/95). Pargo miänástuvvee hoittáámist iššeed vijđes haaldâtlij pargoi tubdâm, šiev sämikulttuur tubdâm já naavcah jiečânâs, ovdâsvástádâslii porgâmân já šiev kirjálâš viestâdemtáiđu. Mij anneep áárvust šiev oovtâstpargo- já vuáruvaikuttâstááiđuid.
Pälkki
Vuávájeijee pälkki miärášuvá Sämitige pälkkivuáháduv vátávâšvuotâtääsi IV/III mield (vuáđupälkki 2931,34 eurod/mp). Vuáđupäälhi lasseen máksojeh 24 % sämikuávlu lase sämmilij päikkikuávlust porgâdijn já pargohárjánem mield miärášuvvee hárjánemlaseh.
Uuccâm
Uuccâmluámáttuv, rijjâtátulii rijjâhámásii uuccâmreeivâ sehe máhđulii ánsuluvâttâllâm já eres lahtosijd kalga toimâttiđ Sämitige čäällimkoodán majemustáá 6.3.2026 räi taan šleđgâlii uuccâmluámáttuv peht: Uuccâmluámáttâh
Lasetiäđuid pargoost addel Sämitige haldâttâhhovdâ Pia Ruotsala-Kangasniemi p. 010 839 3106. Sämitige tooimân puáhtá uápásmuđ nettičujottâsâst www.samediggi.fi.
Anarist 19.2.2026
Sämitigge
