Ulla-Maarit Magga väljejum Sämitige stiivrâ eidusâžžân jesânin

Sämitige uđâsmittem mield Sämitige stiivrâ jesânáid lasettuvvoo ohtâ eidusâš jeessân já kyehti värijeessân. Uđâsmittum Sämitiggelaavâ (414/2025) 13 § mield Sämitigge väljee jieijâs juávhust stiivrâ, mast lii saavâjođetteijee já kyehti värisaavâjođetteijee sehe enâmustáá vittâ eres jeessân. Lasseen Sämitigge väljee jieijâs juávhust stiivrân kyehti värijeessân.

Aalmugijkoskâsii tooimân kyeskee strategia peividem ovdán

Čuákkimist tollui vuolgâttemsavâstâllâm aalmugijkoskâsii tooimân kyeskee strategia peividmist. Sämitige toimâvuávám já budjet 2025 mield strategia peividuvvoo vâi tot västid valjâpaje 1.9.2024 – 31.12.2027 toimâohjelm uulmijd sehe aalmugijkoskâsijn areenain tábáhtum ovdánem.

Peividmáin strategia lii tárguttâs nanodiđ Sämitige máhđulâšvuođâid uásálistiđ já vaiguttiđ aalmugijkoskâsijn oovtâstpargofoorumijn, ovdediđ sämmilij vuoigâdvuođâid sehe pyehtiđ oovdân algâaalmug uáinuid gloobaallijn koččâmušâin.  Vuolgâttemsavâstâllâm vuáđuld ráhtoo iävtuttâs peividum strategiast, mast Sämitige čuákkim taha maŋeláá miärádâs.

Jeessânnoomâtmeh cuákkimist

Sämitige čuákkim toovâi čuávuváid noomâtmijd:

• Nuorâirääđi: Ellen Saijets väljejui Saana Aikio sajan loppâpajan.
• Valjâlävdikodde: Aimo Aikio väljejui värijesânin Pirjo Lotvosii sajan.
• Säämi Kielâkäldee: Neeta Jääskö väljejui Säämi Kielâkäldee stiivrân Terhi Harju sajan tääl joođoost orroo neelji ive toimâpaje loopâ räi. Lasseen väljejui Nilla Tapiola värijesânin Vesa Orassalo, mon sajan Neeta Jääskö lâi ovdil nomâttum.

Sämitige čuákkim 4/2025 tollui 29.9.2025 Sajosist Anarist já káidusohtâvuođâiguin. Čuákkim pevdikirje almostittoo Sämitige nettisiijđoin kyevti oho siste čuákkim tolâmist.

Lasetiäđuh:

Tuomas Aslak Juuso
Saavâjođetteijee sajasâš
040 687 3394
tuomas.juuso@samediggi.fi 

Pia Ruotsala-Kangasniemi
Haldâttâhhovdâ
040 726 2688 / 010 839 3106
pia.ruotsala@samediggi.fi

Johanna Alatorvinen
Viestâdemčällee
040 663 4493 / 010 839 3140
johanna.alatorvinen@samediggi.fi