Säämi kulttuurkuávdáš Saijoos markkânistemhovdân algâttâm Oula Guttorm

Oula Guttorm, kote lii porgâm 10 ihheed Sämimuusikkuávdáá vuávájeijen, lii sirdâšum čohčâmáánu loopâbeln uđđâ hástusij olán, ko sun juátká jieijâs pargokarrieer Sämitiggeest, Säämi kulttuurkuávdáš Saijoos markkânistemhovdân. Guttorm lii jođettâm maaŋgâ ive Ijâttes ijjâ- algâaalmugij muusikfestivaal ornim. Tot lii ohtâ stuárráámuin tábáhtusâin, mii uárnejuvvoo Säämi kulttuurkuávdáš Sajosist. Uđđâ hástusijd já Säämi kulttuurkuávdáš Saijoos ovdedem sun vuárdá luáttávijn mieláin.

–Sajos lii áinoošlajâsâš kongres- já tábáhtustáálu, mast uđđâáigásij já maaŋgâpiälálij viistij sehe ollâ tääsi tekniik áánsust luhostuveh maaŋgâlágáneh tilálâšvuođah. Mun puávtám fárustân kuhes hárjánem tábáhtussyergist já vijđes viärmáduvâid syergi tuáimeid. Mun oskom, ete aktiivlijn já vuáválijn pargoin mij pastep kevttiđ Saijoos oles potentiaal Tave-Laapi stuárráámužžân konferenskuávdážin. Mun vuárdám moovtâ, ete mun peesâm ovdediđ Saijoos tooimâ oovtâstpargoost pargeiguin já Sämitige stivráin, iätá Guttorm

Sämitigge kulluuttij markkânistemhoovdâ virge uuccâmnáál syeinimáánust 2025. Markkânistemhoovdâ viirgán pottii meriääigi räi käävci ucâmuššâd. Sämitige stivrâ sahhiittâlâi occein kuuđâs já toovâi miärádâs valjiimist čuákkimstis 12.9.2025.

Sahhiittâlmij maŋa Sämitige stivrâ valjij oovtâmielâlávt markkânistemhoovdâ viirgán Oula Guttorm. Guttorm lii algâttâm virgestis čohčâmáánust 2025. Markkânistemhoovdâ pargoid kulá huolâttiđ Säämi kulttuurkuávdáš Saijoos čuákkimviistij já palvâlusâi markkânistmist já vyebdimist, tábáhtusâi pyevtitmân já orniimân lohtâseijee keevâtlijn aašijn palvâlemohtâduv eres pargeiguin sehe västidiđ palvâlemohtâduv ekonomiast. Markkânistemhovdâ tuáimá Saijoos palvâlemohtâduv tiimi uássin já oles palvâlemohtâduv aldahovdân.

Lasetiäđuh:

Oula Guttorm
Markkânistemhovdâ
Puh. 040 575 5332
oula.guttorm@samediggi.fi

Pia Ruotsala-Kangasniemi
Haldâttâhhovdâ
040 726 2688
pia.ruotsala@samediggi.fi