Sämitige soti-sektor Helsig kollim vuájui sämmilij soti-palvâlusâi oovdedmân
Sämitige sosiaal- já tiervâsvuotâsektor kollij Helsigist 12.-13.3. teivâdmin kuávdášlijd oovtâstpargopeelijd. Sämitige ovdâsteijeeh teivâdii Mela, THL Biopankki já Findata sehe sosiaal- já tiervâsvuotâministeriö ovdâsteijeid.
Kooveest Riitta Lehtola-Kosonen, Tuomas Aslak Juuso, Anni Koivisto já Mela Pirjo Saari já Sonja Lilius.
Sämitigge teivâdij Mela ohtâdâhhoovdâ Pirjo Saari já lahâašijhoovdâ Sonja Lilius tuorâstuv 12.3. Teivâdmijn savâstâllii eromâšávt Peerust puásuituállest -tooimâ oovdedmist já olášutmist sämipalgâsij já sämipuásuituállei uáinust. Savâstâlmijn tiäduttui tárbu ovdediđ palvâlus já tooimâ oovtâst sämituáimeiguin, väldimáin vuotân eromâšávt palvâlusâi kulttuurmiäldásâšvuođâ sehe sämikielâlâšvuođâ.
Sämitiggeest teivâdmân uásálistii saavâjođetteijee sajasâš Tuomas Aslak Juuso, sosiaal- já tiervâsvuotâčällee Riitta Lehtola-Kosonen já vs. sosiaal- já tiervâsvuotâčällee Anni Koivisto.
Sämitigge uápásmui THL Biopankki já Findata tooimân
Sämitige soti-čälleeh Riitta Lehtola-Kosonen já Anni Koivisto uápásmuin Tiervâsvuođâ já pyereestvaijeem lájádâs váldukonttorist Tilkanmäkist Biopankki já Findata tooimân tuorâstuv 12.3. THL Biopankki lii väldikodálâš biopankki, moos noreh já mast siäiluttuvvojeh mávsuliih tutkâmčáittuseh oles Suomâ kuávlust. Findata lii sosiaal- já tiervâsvuođâsyergi tiätulopevirgeomâhâš. Kuohtui tuáimeiguin koččâmušâst lâi vuossâmuš oovtâstpargoteivâdem.
Teivâdmist kieđâvuššii Biopankki sehe Findata tooimâ sehe máhđulâšvuođâid puáttee oovtâstpaargon. Findatast lii tehálâš rooli sosiaal- já tiervâsvuotâtiäđui nubesajasii kiävtust, mast tiäđuh kiävttojeh ovdâmerkkân tutkâmušân, lovottuvváid já oovdedmân eidusii tipšom- tâi ášástâllâmtile ulguubeln.
Kooveest Riitta Lehtola-Kosonen, Tuomas Aslak Juuso, Anni Koivisto sehe sosiaal- já tiervâsvuotâministeriöst Veli-Mikko Niemi já Anna Cantell-Forsbom.
Teivâdem sosiaal- já tiervâsvuotâministeriö ovdâsteijeiguin.
Sämitigge teivâdij lasseen sosiaal- já tiervâsvuotâministeriö kansliahoovdâ Veli-Mikko Niemi sehe sosiaal- já tiervâsvuođâhuolâttâs äššigâsah já palvâlusah -uásáduv hoovdâ Anna Cantell-Forsbom 12.3. Teivâdmist savâstâllii sämmilij sosiaal- já tiervâsvuođâpalvâlusâi turviimân já oovdedmân čujottum staatâtorjuu tiileest já sämmilii psykososiaallii torjuu ohtâdâh Uvjj – Uvjâ – Uvja jotkâruttâdemtáárbust já tooimâ fastâdmist.
Sämitiggeest teivâdmân uásálistii saavâjođetteijee sajasâš Tuomas Aslak Juuso, vs. sosiaal- já tiervâsvuotâčällee Anni Koivisto já sosiaal- já tiervâsvuotâčällee Riitta Lehtola-Kosonen.
Sämitigge já Tiervâsvuođâ já pyereestvaijeem lájádâs (THL) čuákkimistii Helsigist 13.3.2026 ihásij oovtâstpargosopâmušráđádâlmij ooleest. Čuákkimist meridii aašijn, moh tiäduttuvvojeh ive 2026 oovtâstpargoost.
Lasetiäđuh
Tuomas Aslak Juuso
Saavâjođetteijee sajasâš
040 687 3394
tuomas.juuso@samediggi.fi
Riitta Lehtola-Kosonen
Sosiaal- já tiervâsvuotâčällee
044 777 4820
riitta.lehtola-kosonen@samediggi.fi
Anni Koivisto
vs. sosiaal- já tiervâsvuotâčällee
044 775 6560
anni.koivisto@samediggi.fi
