Sämitigge ocá koordinaattor Sämikielâi káidusmáttááttâs -haahân

Sämitige já Ucjuv kieldâ ohtsâš haahâ uárnee káidusohtâvuođâi peht vuáđumáttááttâs já luvâttâhškovlim tievâsmittee sämikielâi (anarâš-, nuorttâlâš- já tavesämikielâ) máttááttâs sämmilij päikkikuávlu kieldâi ulguubeln orroo škovláid. Máttááttâs- já kulttuurministeriö ruttâd haavâ.

Haavâ koordinaattor västid ohtâvuođâin Suomâ sierâ kuávlui škovláid, škovlim uárnejeijeid já uáppei huolâtteijeid, hämmee sämikielâi máttááttâsjuávhuid já tuáimá aldasii oovtâstpargoost Ucjuv kieldâst pargee proojeekthovdáin sehe haavâ eres pargeiguin. Koordinaattor paargon kuleh meid tieđettem- já oovdânpyehtimpargoh.

Palvâluskoskâvuođâ tiäđuh

Meriáigásâš pargo álgá 1.8.2026 já pištá 31.7.2027 räi. Pargoost lii máhđulâš algâttiđ sopâmuš mield jo tolebáá.

Pargo tevdimist nuávdittuvvoo neelji mánuppaje keččâlemäigi.

Koordinaattor pargo lii Sämitiggeest škovlim- já oppâmaterialtoimâttuvâst, mon toimâsaje lii Säämi kulttuurkuávdáš Sajosist. Pargo lii máhđulâš porgâđ káiduspargon.

Occest mij vyerdip

Asâttâsân vuáđuduvvee tohálâšvuođâvátámâššân lii pargo vaattâm škovliittâs já sämikielâ táiđu (asâttâs 1727/95). Pargo miänástuvvee hoittáámist išedeh sämisiärvus já máttááttâsaašij tubdâm, naavcah jiečânâs já huolâlii porgâmân sehe šiev vuáruvaikuttâstááiđuh.

Pälkki

Pälkki miärášuvá Sämitige pälkkivuáháduv vátávâšvuotâtääsi IV/IV mield (vuáđupälkki 2877,73 eurod/mp). Vuáđupäälhi lasseen máksojeh 24 % sämikuávlu lase sämmilij päikkikuávlust porgâdijn já pargohárjánem mield miärášuvvee hárjánemlaseh.

Uuccâm

Uuccâmluámáttuv, rijjâtátulâš rijjâhámásii uuccâmreeivâ sehe máhđulii ánsuluvâttâllâm já eres lahtosijd kalga toimâttiđ Sämitige čäällimkoodán majemustáá 19.4.2026 räi taan uuccâmluámáttuv peht (lekkâs uđđâ laasân).

Uuccâmluámáttâh

Lasetiäđuid addel škovlimčällee Bigga-Helena Magga, bigga-helena.magga(at)samediggi.fi, puh. +358108393121.

Sämitige tooimân puáhtá uápásmuđ čujottâsâst www.samediggi.fi

Sämikielâi káidusmáttááttâshaavâ tooimân puáhtá uápásmuđ čujottâsâst www.saamenetaopetus.com/hanke

Anarist 24.3.2026
Sämitigge