Sämitigge uásálist Sämmiliih kirhoost -haavâ lopâttemimmeelpalvâlusân Tuurkust
Suomâ evaŋgellâš-luterlâš kirkko uárnee Sämmiliih kirhoost – Sä’mmla ceerkvest – Sápmelaččat girkus – Saamelaiset kirkossa -haavâ lopâttemimmeelpalvâlus Turku tuámukirhoost tuorâstuv vyesimáánu 8. peeivi tme 19. Sämitige saavâjođetteijeeh uásálisteh tilálâšvuotân.
Kyevti ive pištám Sämmiliih kirhoost – Sä’mmla ceerkvest – Sápmelaččat girkus – Saamelaiset kirkossa -haavâ lii ornijdâm Suomâ evaŋgellâš-luterlii kirho pispijčuákkim já ton ulmen lii lamaš raččođ máhđulijd kelduid sämmilij já kirho kooskâst. Tääl haahâ nohá immeelpalvâlusân, mii uárnejuvvoo Turku tuámukirhoost já mii ana sistees katâmâš já soovâdvuođâ tavo sämmilij kuáttá.
– Sämmilijn já evaŋgellâš-luterlii kirhoost lii kuhes já maaŋgâmuđusâš historjá. Munjin lii tehálâš, ete mij lep mieldi čäittimin kunnijâttem taan tábáhtusân. Jyehi sämmiliist lii máhđulâšvuotâ väldiđ vuástá kirho oovdânpyehtim katâmâš já soovâdvuođâ tavo jieijâs vuolgâsoojij mield, iätá saavâjođetteijee sajasâš Tuomas Aslak Juuso.
Sämitige saavâjođetteijee sajasii lasseen immeelpalvâlusân uásálistev I värisaavâjođetteijee Leo Aikio já saavâjođetteijee sajasâš Niina Siivikko. Sämitige jesâneh Tauno Ljetoff já Ulla-Maarit Magga lává toimâm haavâ stivrimjuávhust, mon pispijčuákkim lii nomâttâm.
– Lâi stuorrâ kunnee uážžuđ leđe mieldi haavâ stivrimjuávhust já antologiapargoost. Haavâ ääigi lâi ilo huámmášiđ, maht taat haahâ lii finnim kijttosijd já kunnijâttem miätá oles kirho. Tuáivu mield puátteevuođâst sämmiliih puávtáččii leđe oovtâviärdásiih kirho jesâneh jieijâs vuolgâsoojij mield. Mun tuáivum meid, ete taat haahâ já onnáá immeelpalvâlus taheh jieijâs uásild máhđulâžžân meid addâgâsân adelem, iätá Tauno Ljetoff.
Sämitige čuákkim finnij tiättun Sämmiliih kirhoost -haavâ äigikyevdilijd aašijd cuáŋuimáánu 14. peeivi 2025. Čuákkim kuulâi äššitobden proojeektkoordinaattor Mari Valjakka já sämmilâšpargo čällee Erva Niittyvuopio.
Haavâ lopâttemtilálâšvuođah lijjii Hettaast 23.3.2025 já Anarist 24.3.2025. Sämmilij päikkikuávlu servikodeh láá ornim sáátu Turku tuámukirho lopâttemimmeelpalvâlusân.
Immeelpalvâlus lii puohháid áávus já tom puáhtá čuávvuđ virtuaalkirho peht: https://www.virtuaalikirkko.fi/kirkko/turun-tuomiokirkko/2025-05-08-6h4o12ttom
Luuvâ lase Sämmiliih kirhoost -haavâst: https://evl.fi/plus/paatoksenteko/piispainkokous/saamelaiset-kirkossa/
Lasetiäđuh:
Tuomas Aslak Juuso
Saavâjođetteijee sajasâš
040 687 3394
tuomas.juuso@samediggi.fi
Leo Aikio
I värisaavâjođetteijee
040 621 6505
leo.aikio@samediggi.fi
