Värisaavâjođetteijee Aikio: “Puásuivaahâglaavâ kalga uđâsmittiđ, ige vyerdiđ puásuijáámuid”
Sämitigge teivâdij eennâm- já meccituáluministeriö ovdâsteijeiguin njuhčâmáánu 13. peeivi Helsigist poccui kuáttumenâmij jiäŋumist šoddâm etitile keežild. Eennâm- já meccituáluministeriö ij aalgât puásuivaahâglaavâ miäldásii selvâttem kuáttumenâmij tiileest.
Mulsâšuvvee arve- já puolâššooŋah láá jiäŋudâm eennâm tienuuvt, ete puásui ij paste kuáivuđ purrâmuš olssis. Kove: Asko Länsman, Kaalduáivi paalgâs.
Eennâm- já meccituáluministeriö adelij 13.3.2025 miärádâs, ete tot ij aalgât puásuivaahâglaavâ miäldásii selvâttempargo. Ministeriö oonij, ete hiävu seelvâtmân iä lah tuárvi agâstâllum suujah. Ministeriö mield joođoost ij lah taggaar kivkked šoddâm hiävvu, mii tiävdá hiävvumiäruštâllâm já mii hiäjusmitáččij puásuituáluiäláttâs jotkuuvâšvuođâ.
Sämitige I värisaavâjođetteijee Leo Aikio lii pettâšum eennâm- já meccituáluministeriö miärádâsân. – Suomâ lahâasâttem kalga uđâsmittiđ tienuuvt, ete spiekâstâhlijn tiilijn iše puáhtá finniđ muuneeld, ige eskân puásuijáámui maŋa. Tááláš tile, mast vyerdih čoovčâ räi tiäđu puásuijáámui meereest, ij lah jiärmálâš já lii meid tivrâsub, ko olmâ áigásâš iše etipiemmâmân, iätá Aikio.
Sämipalgâseh láá pivdám 4.3.2025 eennâm- já meccituáluministeriö algâttiđ puásuivaahâglaavâ olášuttem. Sämmilij päikkikuávlust poccuuh iä paste kevttiđ táválijd kuáttumenâmijd toi jiäŋŋum já kuáppum sehe muottuu siste orroo jieŋâkeerdij tiet. Mulsâšuvvee arve- já puolâššooŋah láá jiäŋudâm eennâm tienuuvt, ete puásui ij paste kuáivuđ purrâmuš olssis.
Tile lii tovâttâm poccui vijđes vajâldem já eti- já lasepiemmâm táárbu. Sullâsâš tile lii meid Taažâst já Ruotâst já staatah láá ájáttâlhánnáá pieijâm joton tooimâid puásuituálu turvim várás.
Piätusajanmáávsuid iä määvsi olesmiärálâžžân
Sämitige já eennâm- já meccituáluministeriö teivâdmist savâstâllui meid piätusajanmáávsuin. Staatâ čovgâ ekonomâlâš tile spejâlist meid piätusajanmávssoid tienuuvt, ete taid iä määvsi olesmiärálâžžân.
– Piätusajanmáávsui čuoppâm lii oppeet uđđâ táppu puásuituálleid, kiäi ekonomâlâš tile lii jo ovdiist eromâš čovgâ spiekâstâhtaalvij hiävui maŋa. Poccuuh kuleh omâdâhsyeje pirrâdâhân já toos šaddee hiävust kalga finniđ oles sajanmáávsu. Staatâ heiviittâl piätunaalijd já lii staatâ pargo meid sajanmäksiđ piäđui koddám poccuid, iätá värisaavâjođetteijee Aikio.
Teivâdmân uásálistijn I värisaavâjođetteijee Leo Aikio lasseen Sämitige iäláttâs -já pirâslahâčällee Sarita Kämäräinen já vs. iäláttâsčällee Maria Valkepää.
Lasetiäđuh:
Leo Aikio
I värisaavâjođetteijee
040 621 6505
leo.aikio@samediggi.fi
Sarita Kämäräinen
iäláttâs- já pirâslahâčällee
040 186 7258
sarita.kamarainen@samediggi.fi
Maria Valkeapää
vs. iäláttâsčällee
040 530 9513
maria.valkeapaa@samediggi.fi
