Almottâttâm sämikielâi káidusmáttááttâs piiloothaavâ puáttee luuhâmihán lii tääl joođoost - almoot uáppee fáárun máttááttâsân!
Almottâttâm Sämikielâi káidusmáttááttâs piiloothaavâ máttááttâsân luuhâmihán 2026–2027 lii áávus 31.3.2026 räi. Almottâttâm kuáská sehe máttááttâsâst algâtteijeid já uáppeid, kiäh juátkih máttááttâsâst. Almottâttâm tábáhtuvá tääl vuossâmuu tove Itslearning peht.
Kove: Studio Borga/Sämitigge
Sämikielâi káidusmáttááttâs piiloothaahâ lii Ucjuv kieldâ já Sämitige ive 2018 álgám oovtâstpargohaahâ. Luuhâmive 2025–2026 haavâst láá aldasáid 200 uápped 122 škoovlâst já 46 kieldâst. Taan luuhâmive káidusmáttááttâshaavâst lii valdum anon laađđâmvuáđulâš viermioppâmpiirâs Itslearning. Uáppeeh uásálisteh oppâtijmijd Itslearning peht já uáppei huolâtteijeeh peesih čuávvuđ, maid sij láá porgâm oppâtiijmij ääigi já láá-uv puáttám liävsuh. Tääl Itslearning kiävttoo vuossâmuu tove meid máttááttâsân almottâtmân ovdebáá kiävtust orroo Hellewi-vuáháduv saajeest. Almottâttâm kuáská sehe máttááttâsâst algâtteijeid já uáppeid, kiäh juátkih máttááttâsâst.
Mii máttááttâsâid já kiäs?
Káidusmáttááttâshaahâ fáálá sämikielâ (anarâš-, nuorttâlâš- tâi tavesämikielâ) vuáđumáttááttâs tâi luvâttâhmáttááttâs tievâsmittee sämikielâ máttááttâs 2 tiijme ohhoost. Meid ovdâmáttááttâs uáppeeh pyehtih uásálistiđ haavâ máttááttâsân. Ovdâ- já vuáđuškovlâliih uásálisteh máttááttâsân jieijâs škoovlâst, já škovlâ kalga orniđ káidusuáppei stivrejeijee. Stivrejeijee västid torvolii já rávhálii oppâmpirrâsist káidusoppâtiijmij ääigi sehe teknisij čuolmâi čuávdimist, jis toh iteh.
Máttááttâs lii uáivildum sämiuáppeid, kiäh ääsih sämmilij päikkikuávlu kieldâi ulguubeln já kiäi perruu tâi suuvâ kielâ lii miinii Suomâst sarnum sämikielâin (anarâškielâ, nuorttâlâškielâ tâi tavesämikielâ). Sämikielâ ij taarbâš jo mättiđ vâi puáhtá uásálistiđ máttááttâsân. Haahâ ij faalâ máttááttâs rävisulmuid.
Kii puáhtá almottiđ?
Almottâttâm puáhtá toohâđ huolâtteijee, máttááttâs uárnejeijee, rehtor tâi nube tääsi uáppee. Ko huolâtteijee taha almottâttâm, te mij tuáivup, ete sun lii jo muuneeld ohtâvuođâst uáppee škoovlân já muštâl uáppee haalust já máhđulâšvuođâst uásálistiđ sämikielâi káidusmáttááttâsân.
Almottâttâm maŋa?
Almottâttâmääigi nuuhâm maŋa haahâ lii ohtâvuođâst uáppee päikkikieldân. Tast maŋa mij vuávááškyettip máttááttâsjuávhuid já sämikielâ máttááttâs luuhâmoornig oovtâstpargoost škovlâiguin. Máttááttâsjuávhuh hämmejuvvojeh jyehi sämikielân sierâ väldimáin uáppei ahe- já kielâtääsi, luuhâmoornig já škovlâsáátuid huámmášumán nuuvt pyereest ko máhđulâš. Máttááttâs uárnejuvvoo kielâin já juávhuin, main láá ucemustáá kyehti uáppee. Luuhâmoornigpargo mij porgâp cuáŋuimáánu rääjist kesimáánu loopâ räi. Távjá luuhâmoornigáid puátih nubástusah vala porgemáánust. Máttááttâs äigimuddoin já tiijmij uásálistemravvuin mij tieđettep škoovlân já pááikán porgemáánust. Káidusmáttááttâshaavâ čohčâluuhâmpaje álgá 17.8.2026.
Vääldi huámmášumán, ete motomeh kaavpugeh (Helsig, Oulu já Ruávinjargâ) uárnejeh tavesämikielâ máttááttâs meid aldamáttááttâssân. Jis tun halijdah máttááttâsân, te vääldi ohtâvuođâ jieijâd škoovlâ rehtorân tâi kaavpug škovlâvirgádâhân!
Almoot uáppee máttááttâsân: https://www.saamenetaopetus.com/ilmoittautumisohjeet
Puáttee tábáhtusah sijjân, kiäh láá perustum sämikielâi káidusmáttááttâsâst
Infotilálâšvuotâ káidusmáttááttâsâst perustum huolâtteijeid
Majebaargâ 24.3.2026 tme 17:30–18:30
Servâmliŋkkâ: https://teams.microsoft.com/meet/31685160188036?p=y4aVDKnSPhtJLb3LJ1
Tiervâpuáttim mieldi sämikielâi káidusmáttááttâsân!
Lasetiäđuh
Laura Njunnas, hahâhovdâ
Ucjuv kieldâ
laura.njunnas@edu.utsjoki.fi
040 701 2094
Anne Olli, hahâkoordinaattor
Sämitigge
anne.olli@samediggi.fi
040 687 5989
