Duodji Akademiija 2027 -haahâ vuálgá joton - hahâvuávájeijen algâttâm Birit Tornensis
Duodji Akademiija 2027 -haavâ váldu-ulmen lii paijeentoollâđ já ovdediđ sämmilii kietâtyejimättim sämisiärvusist. Haahâ uárnee pargopájáseminaarijd Iänuduvâst, Taažâ Kuovdâkiäinust já Ruotâbeln Käresavonist. Pargopájáseminaarijn lii fáddán ei. ärbivuáválii tiäđu sirdem suhâpuolvâst nuubán.
Kove: Reetta Tornensis.
Haavâ vuávájeijen lii čohčâmáánust 2025 algâttâm Gárena-Biera Biera Juha Biret, Birit Tornensis. Tornesis lii vuálgus Iänuduv Kilbisjäävrist já sun räähist tuoijum. Suu škovlim lii humanistlii tiettui kandidaat já pyecceitipšoo. Sun lii meid jottáám sämityeje uápuid sämmilij škovlimkuávdáást Juhâmohheest Ruotâst. Tornesis parga káidusin Kilbisjäävrist.
– Mun algâttâm moovtâ pargoid. Haavâ fáddá lii tuođâi tehálâš já munjin tuáijárin eromâš kiäsutteijee. Lii suotâs peessâđ šiev tiimist porgâđ taan fáádá ooleest, iätá Tornesis.
Duodji Akademiija 2027 -haavâ ulmen lii nanodiđ ärbivuáválii sämityeje mättim já sajattuv, turviđ ärbivuáválii tiäđu já tááiđui sirdum nuoráid sehe pyerediđ oppâmateriaalij já digitaallij pargoniävui finnimvuođâ. Lasseen haahâ viggá ovdediđ sämityeje kannatteijen já kilelin ekonomalâžžân iäláttâssân. Haavâst ráhtoo toimâvuávám eettisijn ravvuin, moh kyeskih sämityeje pyevtitmân, vyebdimân já kevttimân, já torvejuvvoo návt sämmilij ärbivuáválâš tiätu.
Haavâ toimâ vuáju ärbivuáválii tiäđusirdem iäláskitmân já naanoodmân luándulii pirrâsist. Haavâ ornim pargopájáseminaareh fäälih ei. nuoráid, tuáijáráid, servijd já organisaatioid máhđulâšvuođâid kietâtyejitááiđui oppâmân, jurdui loonootmân já savâstâlmân sämityeje puátteevuođâst. Siämmást haahâ tuárju raajijd rastaldittee oovtâstpargo Taažâ já Ruotâ sämityeji-instituutioiguin já sämituáijárijguin naanoodmáin sosiaallii oohtânkulluuvâšvuođâ já kulttuurlii identiteet sehe sämikielâ.
Haahâ olášuttoo Suomâ já Taažâ Sämitiigij oovtâstpargon já tom ruttâd EU Interreg Aurora -ohjelm. Aalmuglâš vaastâruttâdem lii uccum Laapi Littoost. Haahâ juátkoo ive 2027 loopâ räi.
Lasetiäđuh:
Birit Tornensis
Vuávájeijee, Sámi Handicraft Academy 2027 -haahâ
040 545 7740
birit.tornensis@samediggi.fi
