Sajosist ávuduvvoo uđâsmittum sämitiggelaahâ já iheluuvij pargo – juhletilálâšvuotâ joođoost eidu tääl

Tilálâšvuotâ lii álgám Suomâ, Taažâ já Ruotâ Sämitiigij sahâvuáruin sehe eereeb iärrás täsivääldi president, máttááttâsminister já europarlamiänttár Anna-Maja Henriksson tiervâttâsâiguin. Lep meid kuullâm ärbivuáválii sämimuusik.

Suomâ Sämitige saavâjođetteijee Pirita Näkkäläjärvi kiijtij savâstis sämiaalmug já sämmilij ustevijd siđhesvuođâst já äŋgirvuođâst.

– Sämitiggelaavâ uđâsmittem lii lamaš sämisiärvádâhân hirmâd stuorrâ ohtsâš pargo, mii piištij loppâloopâst 30 ihheed. Laahâ lii tääl uđâsmittum, kuhes pijne lii lappâd já tađe mield nuáđi lii meddâl čuávuvái suhâpuolvâi ärdein, saavâjođetteijee Näkkäläjärvi eeđâi.

Saavâjođetteijee Näkkäläjärvi ana aalmugijkoskâsijd olmoošvuoigâdvuotâsopâmušâid merhâšitten tahhen sämitiggelaavâ uđâsmitmist.

– Mij ep liččii taan saajeest, jis iä liččii sujâlâžžân čujotteijee čuávduseh, maid OA adelij Suomân Sämitige valjâluvâttâlmist. Suomâ staatâ koolgâi viijmâg toohâđ maidnii. Aalmugijkoskâsâš riehti já njuolgâdussáid vuáđuduvvee vuáhádâh láá uccâ aalmugij já enâmij hiätu, saavâjođetteijee Näkkäläjärvi muštottij.

Täsivääldi president Alexander Stubb eeđâi juuhlán vuolgâttum tiervâttâsâstis, ete sämmilij vuáđulavâlii sierânâssajattuv kattim algâaalmugin lii mii puohâi ohtsâš pargo.

– Kuhháá vuordum uđđâ sämitiggelaahâ lii puáttám vuáimán. Ulmen lii, ete ton mield sämmilij jiešmeridemvuoigâdvuođâ olášum sehe sämikulttuur jiešráđálâš ovdedem puáhtá puáttee ääigi ovdiist pyerebeht turviđ, president Stubb eeđâi.

– Sämitige toimâ lii tehálâš uási sämmilij jiešhaldâšem já vuoigâdvuođâi olášume turviimist. Sämitige já virgeomâhái vuárusavâstâllâm juátkimist já sämmilij uáivilij vuotânväldimist miärádâstohâmist kalga huolâttiđ ohtsâškode puoh taasijn, president Stubb joođhij.

Suomâ staatâ tiervâttâs juuhlán puovtij máttááttâsminister Anders Adlercreutz. Máttááttâsminister Adlercreutz eeđâi savâstis, ete ráđádâllâmmonâttâlmij uásild merhâšittee ij lah tuš tot, mii ceehijn lohá – peic maht mij toimâp. Eromâšávt taat kuáská oovtâsttoimâm- já ráđádâllâmmonâttâlmân virgeomâhái já Sämitige kooskâ.

– Laavâst asâttuvvoo ovdiist tärkkilubbooht monâttâlmist, moin viggâp turviđ sämmilij vuoigâdvuođâ uásálistiđ já vaiguttiđ sijjân kyeskee aššijd. Tuođâlâš ráđádâllâm váátá liijká eenâb. Olmâ ráđádâllâm váátá kuldâlem, ávus mielâ já haalu kavnâđ ohtsijd čuávdusijd meid talle, ko tot váldá ääigi, máttááttâsminister Adlercreutz eeđâi.

Jieijâs tiervâttâs juuhlán puovtij meid europarlamiänttár Anna-Maja Henriksson. Sun tooimâi tolebáá riehtiministerin já lâi mieldi sämitiggelaavâ uđâsmitmist maaŋgâ valjâpaje ääigi.

– Ubâ paje lii lamaš koččâmuš sämmilij jiešmeridemvuoigâdvuođâ kunnijâtmist já taggaar laavâ aasâtmist, mii ij lah ruossâlâs Suomâ čannee aalmugijkoskâsij kenigâsvuođâiguin, europarlamiänttár Henriksson eeđâi.

– Mun lam meid eromâš ilolâš, ko uážžum juátkiđ oovtâstpargo tiiguin Euroop parlament jesânin. Euroop áinoo algâaalmugin tii vuoigâdvuođâid kalga nanodiđ meid Euroop tääsist. Tii mieldiorroom meid Euroop parlamentist já Brysselist kalga ovdediđ, Henriksson joođhij.

Tilálâšvuođâst lep meid kuullâm Taažâ já Ruotâ Sämitiigij ovdâsteijei sahâvuáruid. Saavâin lii tiäduttum sämmilij oovtâstpargo merhâšume sämmilij vuoigâdvuođâi oovdedmist staatâraajij rasta sehe meid ohtsiih hástuseh.

Eehidpeeivi ohjelmist lii paaneelsavâstâllâm, mon läiđee Suvi West. Panelist savâstâlleeh muštâleh sämitiggelaavâ uđâsmittemproosees vuáttámušâin já keččih ovdâskulij laavâ olášutmân.

Tilálâšvuotâ nohá tme 15.30 ohtsii káhvástâlmân Sajosist, já juhlepeeivi nohá ehidist Saijoos auditorio Dollast Ulla Pirttijärvi & Ulda -juávhu konsertân. Eehidkonsert lii puohháid áávus ige vaađâ munealmottâttâm. Sajeh láá räijejum meeri já toh tiävdojeh puáttimoornigist te pääihi oolâ kannat puáttiđ ääigild.

• Peeivi ohjelm puáhtá čuávvuđ káidusin tulkkum vuolgâttâssân čujottâsâst: https://us06web.zoom.us/j/84081619667
• Konsert puáhtá čuávvuđ čujottâsâst: www.sajos.fi/live
• Saavâid já tiervâttâsâid puáhtá luuhâđ Sämitige dokumentpaaŋkist.

Tilálâšvuođâ vyerkkejum vuolgâttâsâid puáhtá keččâđ kyevti oho ääigi tábáhtus maŋa. Liiŋkah vyerkkejum vuolgâttâssáid almostittojeh maŋeláá Sämitige nettisiijđoin já sosiaallii media kanavijn.

Lasetiäđuh

Pirita Näkkäläjärvi
saavâjođetteijee
044 7533 766

Saara-Maria Salonen
saara-maria.salonen@samediggi.fi
044 739 4007

Johanna Alatorvinen
Viestâdemčällee
040 663 4493
johanna.alatorvinen@samediggi.fi