Turku ollâopâttâh, Ucjuv kieldâ já Sämitigge nanodeh oovtâstpargo
Turku ollâopâttuv, Ucjuv kieldâ já Sämitige ohtsâš ulmen lii arktâsii kuávlu nubástus já maaŋgâhámásâšvuođâ tááhust kuávdášlij teemai tarkkum. Konkreetlâš ovdâmerkkâ oovtâstpargoost lii vuávámnáálá orroo oppâlájádâsoovtâstpargo Turku ollâopâttuvváin já Ucjuv luvâttuvváin.
Sämitige saavâjođetteijee sajasâš Tuomas Aslak Juuso, Turku ollâopâttuv rehtor Marjo Kaartinen já Ucjuv kieldâhovdâ Päivi Kontio vuáláčallii oovtâstpargosopâmuš majebaargâ 24.6.2025 Porist. Kove: Turku ollâopâttâh.
Turku ollâopâttuv rehtor Marjo Kaartinen, Ucjuv kieldâhovdâ Päivi Kontio já Sämitige saavâjođetteijee sajasâš Tuomas Aslak Juuso vuáláčallii oovtâstpargosopâmuš majebaargâ 24.6.2025 Porist.
Sopâmušân lii čallum jieškote-uv uásipele ohtsâš táttutile kuhesáigásii oovtâstpargon já kyeimivuođâ oovdedmân tutkâm já škovlim sehe ovdedem- já vaikuttemhaavâi peht.
Škovlim uásild mittomeerrin lii maaŋgâhámásâš oppâlájádâsoovtâstpargo Ucjuv luvâttuv já Turku ollâopâttuv kooskâst. Uđđâlágán, raajijd rastaldittee škovlimoovtâstpargo viggá eereeb iärrás lasettiđ ollâškovlim kiäsutteijeevuođâ.
Tutkâm uásild kuávdášlijd teemaid lii tárguttâs smiettâđ oovtâstpargoost já toi tutkâmân occoo ruttâdem oovtâst.
Oovtâstpargo já algâmuddoost eromâšávt oppâlájádâsoovtâstpargo huksejuvvoo arktâsii kuávlu nubástus já maaŋgâhámásâšvuođâ pirrâ. Ulmuu toimâ, täävih já ärbivyevih, iäláttâsah, kielâ já kulttuur lohtâseh västideijee vuovvijn piirâs, šoŋŋâduv já luándu maaŋgâhámásâšvuođâ nubástusân já muttojeijee geopolitiik tovâttem hástusáid.
Ulmen lii tarkkuđ vijđáht muttojeijee luándupiirâs, kulttuur já ohtsâškode sehe iäláttâstooimâ vuáruvaikuttâs já arktâsii kuávlu rooli gloobaal ovdánmist.
– Aldanep olesvuođâ Turku ollâopâttâhân tijpâlii vyevi mield maaŋgâtieđâlávt ovdâmerkkân luándutieđâlii, kulttuurlii já geopooliitlii-uv uáinust. Turku ollâopâttuvâst lii kuhes ärbivyehi arktâsii kuávlu nubástus čuávvumtutkâmist, já Kiävu tutkâmsajattuvâst lii täst koskâsâš pargo, rehtor Marjo Kaartinen muštâl.
– Ucjuv kieldâst annoo eromâš tehálâžžân, ete mij pastep faallâđ mii uáppeid uđđâ máhđulâšvuođâid jieŋâlmittiđ jieijâs luvâttâhuápuid. Mun oskom, ete taansullâsâš maaŋgâsuárgág oovtâstpargo puáhtá osko puátteevuotân meid kieldâ uáinust já taha máhđulâžžân pyeremuu muddoost tutkâm já tiettuu pyehtim konkreetlávt kieldâässei já iärásij olleemvuotân já lasseet ulmui tiäđulâšvuođâ nubásmuvvee pirrâsist, Ucjuv kieldâhovdâ Päivi Kontio iätá.
– Ličij suotâs, ete mist ličij puátteevuođâst maaŋgâtieđâlâš, arktâsâš algâaalmugmättimkuávdáš, mast mij puávtáččijm oovtâstpargoost ovdediđ tutkâm, mii palvâl sämisiärvus já ton táárbuid. Šoŋŋâdâhnubástusteemai lasseen mij puávtáččijm tuárjuđ sämmilii finnodâhtooimâ pyevtitmáin tiäđu, mii váldá huámmášumán sämi-iäláttâsâi maaŋgâlágánijd táárbuid já oovded innovaatioid eellimvyeimi nanodem várás, Sämitige saavâjođetteijee sajasâš Tuomas Aslak Juuso paahud.
Lasetiäđuh:
rehtor Marjo Kaartinen, Turku ollâopâttâh, p. 040 523 4722
kieldâhovdâ Päivi Kontio, Ucjuv kieldâ, p. 040 744 7630
saavâjođetteijee sajasâš Tuomas Aslak Juuso, Sämitigge, p. 040 687 3394
