Savâstâllâmráiđu nuorttâlâškielâ tiileest: Kielâpiirâs savâstâllâmtilálâšvuotâ Avelist
Sämitigge puávdee savâstâllâđ nuorttâlâškielâ tiileest já oovdedmist. Savâstâlmij ulmen lii nuurrâđ oohtân sierâ tuáimeid smiettâđ čuávdusijd, moiguin kielâ tile puávtáččii pyerediđ oovtâstpargo já jo orroo resursij vievâst. Savâstâlmeh viggeh kavnâđ čuávdusijd já keččih puátteevuotân. Táárbu mield fáádá kieđâvuššâm aalgâst kärttejuvvoo tááláš tile.
Kove: Tarmo Lehtosalo / Nuorttâlâškulttuursiäđus.
5. Kielâpiirâs savâstâllâmtilálâšvuotâ Avelist 24.9.2025 tme 18–20
Tilálâšvuotâ uárnejuvvoo Tiärmásist já päikkin lii Törmäsen keidas kuáti.Tilálâšvuotâ lii aldateivâdem já toos ij pyevti uásálistiđ káidusohtâvuođáin. Tilálâšvuođâst savâstâllâp nuorttâlâškielân lohtâseijee kielâpirrâsist ađai eereeb iärrás tast, magareh tobdoh, ovdâjurduuh já uáinuh láá nuorttâlâškielâ kuáttá.
Jođetteijen tuáimih Uvjj – Uuvjâ – Uvja ađai sämmilii psykososiaallii torjuu ohtâduv ovdâsteijee já Sämitige kielâtoimâttuv ovdâsteijeeh. Tilálâšvuođâst puáhtá kevttiđ Suomâst ellee sämikielâid já suomâkielâ.
Tilálâšvuotân ij taarbâš almottâttâđ muuneeld.
Tilálâšvuođâst nuávdittep Sämitige nuorâirääđi rähtim torvolii tile ravvuid, moh tiädutteh kunnijâttem já luávkkááhánnáávuođâ.
Tiervâpuáttim!
Luuvâ lase: Sämitigge uárnee savâstâllâmrááiđu nuorttâlâškielâ tiileest
Mij tuáivup savâstâlmáid fáárun tuáimeid, kiäh láá perustum nuorttâlâškielâ tile oovdedmist tâi pargeh kielân lohtâseijee ašijguin. Meid nuorttâlâškielâlij palvâlusâi kevtteeh, kielâ sárnooh já ovtâskâs ulmuuh láá tiervâpuáttim.
Savâstâllâmráiđu lii uási Sämitige kielâpooliitlii toimâ- já ovdedemohjelmist ivvijd 2025–2027. Sämitige tievâsčuákkim lii asâttâm valjâpaje kuhes áigáduv toimân nuorttâlâškielâ iäláskittem, nanodem já ovdedem. Sämitige uáinu mield nuorttâlâškielâ tile spiekâst anarâš- já orjâlâškielâ tiileest já váátá eromâš tooimâid iäláskitmân. Hástusin lii aiccum tot, ete nuorttâlâškielâ iäláskittem tâi vijđásubbooht kielâvuávám ij koordinist mihheen peelijd systemaatlávt. Tondiet Sämitigge haalijd tääl povdiđ sierâ tuáimeid savâstâllâđ tast, maht nuorttâlâškielâ iäláskittempargoost puávtáččii ovdániđ. Čäällip savâstâlmijn muštottemčálusijd, moi vuáđuld juátkip nuorttâlâškielâ ovdedempargo Sämitiggeest.
Savâstâlmeh uárnejuvvojeh oovtâstpargoost Nuorttâlij sijdâčuákkimáin já Nuorttâlâškulttuursiättusijn.
Lasetiäđuh:
Anne-Kirste Aikio, kielâtorvočällee
anne-kirste.aikio@samediggi.fi
Marko Marjomaa, kielâašijčällee
marko.marjomaa@samediggi.fi
Niina Aikio-Siltala, kielâpiervâlstivrejeijee
niina.aikio-siltala@samediggi.fi
