Sämitigge kijttá Laapi pyereestvaijeemkuávlu kuávluváldustiivrâ
Laapi pyereestvaijeemkuávlu kuávluváldustivrâ čokkânij vuossaargâ 23.2.2026 meridiđ merhâšittein ekonomia heiviittemtooimâin. Kuávluváldustivrâ meridij tuárjuđ kuávlustiivrâ iävtuttâs, mon mield sehe Muonio seŋgâuásáduv já Avveel ijâppiäiválii kocceem jotkum torvejuvvoo. Kuávluváldustivrâ meridij meid, ete iä looppât Käresavvoon tiervâsvuotâsajattuv. Sämitigge lii eromâš tuđâvâš kuávluváldustiivrâ miärádâssáid.
Kove: Johanna Labba
– Mij kijttep lieggâsávt kuávluváldustiivrâ jesânijd, kiäh meridii piäluštiđ sämmilij päikkikuávlu já ton ässeid uáivildum palvâlusâid. Palvâlusâin, moh tuáimih já láá pyereest juksâmnáál, lii stuorrâ merhâšume kuávlu ulmuid já vijđásubbooht eellimvuáimán. Lii tehálâš, ete sämmilij päikkikuávlu ulmuin lii luáttámuš toos, ete sist annoo oovtâviärdásávt huolâ, iätá Sämitige saavâjođetteijee sajasâš Tuomas Aslak Juuso.
Sämitige mield lii tehálâš, ete ton oovdân pyehtim uáinuh váldojii vuotân Laapi pyereestvaijeemkuávlu váldustiivrâ miärádâsâin. Sämitigge lii viggâm sehe ráđádâlmij, ciälkkámuš já almolij uáivilalmottâsâi vuovvijn vaiguttiđ miärádâstohâmân.
– Mun lam tuđâvâš, ete kuávluváldustivrâ lii uápásmum huámmášuumijd, maid mij lep toimâttâm, já váldám taid tuođâlávt. Taat tuárju jieijâs uásild ovdedeijee já šiev oovtâstpargo meid puátteevuođâst, juátká Juuso.
Sämitigge ana tehálâžžân, ete oovtâstpargo juátkoo ekonomia heiviittemtooimâi olášutmist. Laapi pyereestvaijeemkuávlu heiviittemtooimâin lii soppum ei. kylái palvâlusâi heivitmist já veikâ Muoniost seŋgâuásádâh juátká, te virgeääigi ulguupiälááš huáppuvuástáväldim ličij nuhâmin. Ko taah vuáváámeh tärkkilistuveh, te Sämitigge haalijd leđe mieldi visásmitmin, ete nubástusâi čuávumuššân sämmilij päikkikuávlu kylái palvâlusah iä hiäjusm peic juvsâttettee palvâlusah láá fáállun puoh ahe- já äššigâsjuávhoid.
Lasetiäđuh:
Tuomas Aslak Juuso
Saavâjođetteijee sajasâš
040 687 3394
tuomas.juuso@samediggi.fi
