Sämitigge tuáivut luho tuotâvuotâ- já sovâdâttâmkomissio komissaaráid tiäđualmostittem staatâpalhâšuumeest

Sämmilij tuotâvuotâ- já sovâdâttâmkomissio komissaareh lijjii ohtâ tiäđualmostittem staatâpalhâšume 2026 finnejeijein. Palhâšume mieđettui vädis historjálij vuáttámušâi oovdân pyehtimist vâi ohtsâškodálâš ibárdâs lassaan já savâstâllâm ovdán.

Tieđâ- já kulttuurminister Mari-Leena Talvitie juovij palhâšume 8.6.2026 Oulust komissaaráid ađai riehtitiettuu tuáhtár Hannele Pokan, haldâttâhtiettui maister Irja Jefremofân, arkkâpispe emeritus, teologia tuáhtár Kari Mäkisâžân, ollâopâttâhlehtor emerita, ohtsâškoddetiettui tuáhtár Anni-Siiri Länsmanân já puásuituállee já irâtteijee Heikki Palton.

– Sämitigge tuáivut váimulávt luho tuotâvuotâ- já sovâdâttâmkomissio komissaaráid merhâšittee tubdâstâsâst. Tubdâstâs lii meid kijtto toid 400 sämmilâžân, kiäh juovii jieijâs muštâlusâid komissioin já kiäi vuáttámušah lijjii vuáđđun tuotâvuotâ- já sovâdâttâmkomissio vijđes raportân, iätá Sämitige saavâjođetteijee Pirita Näkkäläjärvi.

Vuáđustâlmijn pahuduvvoo, ete Sämmilij tuotâvuotâ- já sovâdâttâmkomissio pargoost olgos puohtum tiätu spejâlist nuuvt miärádâstohâmân ko meid almos savâstâlmân já kulttuurân. Suomâ staatâ lii huksejum syemmilij já sämmilij enâmáid, mutâ sämmilij vuáttámušah láá kuhháá pááccám privatin. Tuáimee já vuoigâlii ohtsâškode iähtun lii äppi kuáhtáđ jieijâs historjá rašes soojijd. Taat váátá, ete vädis já toske tovâtteijee vuáttámušah puáhtojeh uáinusân já kieđâvuššâmnáál. Tuše návt huksejuvvoo vuáđu jotkâpargo já ohtsâškodálii čavosmem várás.

Sovâdâttâm huksim lii meritiätulâš pargo

Staatâpalhâšume vuáđustâlmijn pahuduvvoo meid, ete Sämmilij tuotâvuotâ- já sovâdâttâmkomissio pargo naanood tiäđu peht máhđulâšvuođâid sämmilâšvuođâ puátteevuođâ huksiimân Suomâst.

Sämitigge siärvá taan jurdui. Sovâdâttâm huksim lii meritiätulâš pargo pyere oovtâstpargoost.

– Tuotâvuotâ- já sovâdâttâmkomissiopargo lii mijjân stuorrâ máhđulâšvuotâ. Tuotâvuotâ- já sovâdâttâmkomissio iävtuttâsâi vuáđuld lii máhđulâš finniđ puigâ nubástus já uđđâ áálguid sämiaašijn Suomâst. Sämitige vuárdámušah láá ollâgâsâst jotkâpargo háárán, iätá saavâjođetteijee Näkkäläjärvi.

Tuotâvuotâ- já sovâdâttâmkomissio oovdânpuovtij loppâraportist 68 toimâiävtuttâssâd. Iävtuttâsâi tuáváást lii komissio finnim ibárdâs sämmilij pyere puátteevuođâ vaattâm poolitlijn linjiimijn já tooimâin.

Parlamentaarlâš pargojuávkku, mii árvuštâl Sämmilij tuotâvuotâ- já sovâdâttâmkomissio avžuuttâsâid, lii algâttâm pargos uáivičällen oovdiš uáiviminister Antti Rinne. Parlamentaarlii pargojuávhu pargo toorjân lii Sämmilij tuotâvuotâ- já sovâdâttâmkomissio avžuuttâsâid árvuštellee parlamentaarlii pargojuávhu koordinistem- já čuávvumjuávkku, mast láá ovdâstum meid Sämitigge já Nuorttâlij sijdâčuákkim.

Sämitigge meridij čuákkimist 26.2.2026 jieijâs uáivilijn toimâiävtuttâssáid. Sij onnii puoh tooimâid kyeditteijen, mutâ lasseen Sämitigge čokkij tehálumosijd huápulijd tooimâid kuovttijn lasattâssáin.

Staatârääđi asâttij Sämmilij tuotâvuotâ- já sovâdâttâmkomissio oovtâstpargoost Sämitiggijn já Nuorttâlij sijdâčuákkimáin 28.10.2021.

Lasetiäđuh:

Pirita Näkkäläjärvi
Saavâjođetteijee
044 753 3766
pirita.nakkalajarvi@samediggi.fi