Muštâlus ovdâskoodán
Uđâsmittum sämitiggelaavâ mield Sämitigge tooimât jyehi ive ovdâskoodán muštâlus, mii čuákkee oohtân ääigi tääsist leijee árvuštâllâm sämmilij kielâlij já kulttuurlij vuoigâdvuođâi, jiešhaldâšem já eellimtile ovdánmist. Muštâlus ana sistees sehe Sämitige iävtuttâsâid, já meid vijđes čielgiittâs tast, maht sämmilij vuáđu- já olmoošvuoigâdvuođah láá olášum muštâlusive ääigi.
Ovdedemiävtuttâsah já vuoigâdvuođâi olášume
Muštâlus ulmen lii nanodiđ vuáruvaikuttâs ovdâskode já Sämitige kooskâ, lasettiđ tiäđulâšvuođâ sämmilij tiileest Suomâst já tuárjuđ algâaalmugvuoigâdvuođâi olášuttem čuávvum väldikode alemuu tääsist.
Muštâlusâst oovdânpuáhtojeh konkreetliih toimâiävtuttâsah, moiguin virgeomâhááh já lahâasâtteijeeh pyehtih pyerediđ sämmilij vuoigâdvuođâi olášume.
Ovdâskoddeest lii ovdâsvástádâs visásmittiđ, ete vuáđulaavâst já aalmugijkoskâsijn olmoošvuoigâdvuotâsopâmušâin turvâstum sämmilij vuoigâdvuođah olášuveh meid keevâtlii elimist. Taat váátá lahâasâttem olášuttem aktiivlii čuávvum, tuárvi pyereh já muuneeld tiäđust leijee resurseh sehe sämmilij jiešhaldâšem systemaatlii kunnijâttem puoh almos miärádâstohâmist.
Muštâlus kieđâvuššâm ovdâskoddeest
Sämitiggelaavâ miäldásâš vijđedum muštâlus toimâttuvvoo jyehi ive njuolgist ovdâskoodán. Muštâlusân ij lah meriäigi já ton vuolgâttemsavâstâllâm viggeh orniđ nuuvt jotelávt ko máhđulâš tast maŋa ko muštâlus lii puáttám ovdâskoodán. Muštâlus pyehtih kieđâvuššâđ vuáđulahâváljukoddeest, já váljukodde, mii ton kieđâvuš, meriduvvoo vuolgâttemsavâstâlmist sahâalmairääđi iävtuttâs vuáđuld.
Muštâlusmonâttâllâm ovdâskoddeest
