Eeʹttiǩ-kåʹddčiõlǥtõs
Oođuum sääʹmteʹǧǧlääʹjj meâldlânji Sääʹmteʹǧǧ tooiʹmat eeǥǥlânji eeʹttiǩ-kådda čiõlǥtõõzz, kååʹtt nåårr õʹhtte ääiʹjtässʼsaž aʹrvvõõzz säʹmmlai ǩiõlʼlaž da kulttuursaž vuõiggâdvuõđi, jiõččvaaldâšm da jieʹllemtueʹjjeeʹji õuddnummšest. Čiõlǥtõs âânn seʹst nuʹt Sääʹmteeʹǧǧ eʹtǩǩõõzzid, ǥu veiddsõs čiõlǥtõõzz tõʹst, mäʹhtt säʹmmlai vuâđđ- da ooumažvuõiggâdvuõđ lie teâuddjam čiõlǥtõseeʹjj äiʹǧǧen.
Õõuʹdeemeʹtǩǩõõzz da vuõiggâdvuõđi teâuddjummuš
Čiõlǥtõõzz täävtõsân lij raaveed eeʹttiǩ-kååʹdd da Sääʹmteeʹǧǧ kõskksaž vuârrvaaiktõõzz, lââʹzzted teâđstummuž säʹmmlai vueʹjjest Lääʹddjânnmest di tuärjjeed alggmeervuõiggâdvuõđi tiuʹddepiijjmõõžž seuʹrrjummuž väʹlddkååʹdd pââimõs tääʹzzest.
Čiõlǥtõõzzâst eʹtǩǩeet konkreettlaž tåimmeʹtǩǩõõzzid, koivuiʹm veʹrǧǧneeʹǩǩ da lääʹjjšiõtteei vuäiʹtte pueʹreed säʹmmlai vuõiggâdvuõđi teâuddjummuž.
Eeʹttiǩ-kååʹdd vaʹstteem vueʹlnn lij ainsmâʹtted, što vuâđđlääʹjjest da meeraikõskksaž ooumažvuõiggâdvuõttsuåppmõõžžin staanum säʹmmlai vuõiggâdvuõđ teâuddje še tuõtt jieʹllmest. Tät kaiʹbbai lääʹjjšiõtteem toimmupiijjmõõžž aktiivlaž seuʹrrjummuž, riʹjttjeei da õudlkõʹstti resuursid di säʹmmlai jiõččvaaldâšm meäʹrmeâldlaž ciʹsttjummuž puk õõlmâs tuʹmmstõktuâjast.
Čiõlǥtõõzz ǩiõttʼtõõllmõš eeʹttiǩ-kååʹddest
Sääʹmteʹǧǧlääʹjj meâldlaž veeiduum čiõlǥtõõzz tooiʹmtet eeǥǥlânji vuõiʹǧǧest eeʹttiǩ-kådda. Čiõlǥtõʹsse ij leäkku mieʹrräiʹǧǧ, da tõn vuõlttõs-saǥstõõllmõõžž põõrǥât jäʹrjsted sõõrǥmõõzz mieʹldd mâŋŋa ǥu čiõlǥtõs lij kuåsttuum eeʹttiǩ-kådda. Čiõlǥtõõzz vueiʹtet ǩiõttʼtõõllâd vuâđđlääʹǩǩvälljkååʹddest, da ǩiõttʼtõõlli välljkåʹdd meäʹrrââvv vuõlttõs-saǥstõõllmõõžžâst saakkooumažsuåvtõõzz eʹtǩǩõõzz vuâđald.
Čiõlǥtõsmõõntõõllmõš eeʹttiǩ-kååʹddest
