Media

Sääʹmteeʹǧǧ sååbbar norrââtt täujja Sääʹmkulttuurkõõskõs Sajoozzâst Aanrest. Såbbar lie õlmmâz da tõid vuäitt seuʹrrjed pääiʹǩ âʹlnn parlameʹnttkueʹrncest leʹbe Zoom webinaar pääiʹǩ. Parlameʹnttkueʹrncest tuʹlǩǩeemaparaatt lie ǩiõččji ââʹnnmest. Vuõigg vuõlttõõzz pääiʹǩ lij vueiʹtlvaž kulddled tuʹlǩǩuum ǩiõl kueʹrncest kullum ǩiõl lââʹssen.

Tän õõl pâstt jeeʹres šõddmõõžžid še seuʹrrjed striim mieʹldd.

Seuʹrre såbbar

Sääʹmteeʹǧǧ Flickr-tiilâst kaaunak snimldõõǥǥid jm. Sääʹmteeʹǧǧ tuåimmjummšest, vuäzzlain da šõddmõõžžin. Snimldõõǥǥid vuäitt ââʹnned teâđ jååʹđtem määinast šiõǥǥ naaʹlid jääʹǩǩteeʹl. Mieʹrǩǩe snimldõõǥǥ teâttkääiv da sniimmi nõõm, jõs sniimmi nõmm lij peäggtum.

Snimldõõǥǥ

Sääʹmteeʹǧǧ snimldõõǥǥid vuäǯǯ ââʹnned ođđsid da jeeʹres teâđ juâkkmõõžž kääzzkõʹstti õhttvuõđin. Snimldõõǥǥi âânnmõš lij määuʹsteʹm. Sääʹmteeʹǧǧ snimldõõǥǥid ij vuäǯǯ ââʹnned ǩeeitâʹsttma da markknâʹsttma. Seämmanalla tõi âânnmõš lij ǩiõlddum tiânnâsjurddjin mâʹte paaiʹdin leʹbe kooppin. Snimldõõǥǥid ij vuäǯǯ arkivâʹstted leʹbe uʹvdded kuälmad vueʹssbieʹlid. Snimldõõǥǥ teâttkäivv âlgg iʹlmmted šiõǥǥ nääʹl meâldlânji.

Snimldõõǥǥi pukin ââʹnnemjurddjin âlgg väʹldded lokku snimldõõǥǥâst kuâsttjeei oummid da taarbšeʹmmen vuäǯǯad sij miâsttmõõžž snimldõõǥǥ ââʹnnma. Sääʹmteeʹǧǧ snimldõõǥǥid ij vuäǯǯ ââʹnned šiõǥǥ nääʹl vuâstlânji. Täin juuʹrdet snimldõõǥǥi âânnmõõžž ouddmiârkkân nåkam õhttvuõđâst, kååʹtt puätt vuõǥsmed snimldõõǥǥâst kuâsttjeei oummu leʹbe sniimmi äärv. Snimldõõǥǥi siiskõõzz ij vuäǯǯ muttstõõllâd.

Snimldõõǥǥ õõʹni ij taarbâž jeeʹrab haʹŋǩǩeed sniimmi lååʹv tõn diõtt, ko Sääʹmteʹǧǧ lij haʹŋǩǩääm snimldõõǥǥid veiddsõs ââʹnnemvuõiggâdvuõđivuiʹm. Tõn sâjja ââʹnnemvuõiggâdvuõtt ij âânn seʹst ni mõiʹd jeeʹres looʹvid, koon snimldõõǥǥ âânnmõš siiskõõzzâs leʹbe snimmum ääʹšš peäʹlest vueiʹtlvânji ooudald. Taarbšum lååʹv vuäiʹtte leeʹd snimldõõǥǥâst kuâsttjeei oummi miâsttmõõžž haʹŋǩǩummuž snimldõõǥǥ ââʹnnma ođđ ââʹnnemõhttvuõđâst. Jõs snimldõõǥǥâst lie raajjivuõiggâdvuõđlânji suõjjuum tuâj leʹbe täʹvvermiârk (bräänd), snimldõõǥǥ âânnmõš vuäitt ooudlded kõõččmõõžžâst åårrai vuõiggâdvuõđi tuõʹllʼjeeʹji lååʹv.

Jõs õõʹnni lij huõlteʹmes ouddâl peäggtum looʹvi haʹŋǩǩummšest da âânnmõš neeuʹrat kuälmad vueʹssbieʹli immateriaalvuõiggâdvuõđid (raajjivuõiggâdvuõđid, täʹvvermiârkkvuõiggâdvuõđid) leʹbe jeeʹres vuõiggâdvuõđid (ouddm. snimldõõǥǥâst kuâsttjeei oummu vuõiggâdvuõđid mieʹrreed snimldõõǥǥâs ââʹnnmest), õõʹnni vaʹsttad näkam neeuʹrteei âânnmõõžž diõtt Sääʹmtegga šõddâm skääđain da kuulin. Vueʹlǧǧemsââʹjjen lij, što õõʹnni vaʹsttad vuõiʹǧǧest kuälmad vueʹssbieʹlid šõddâm skääđast.

Ââʹnnem-määinai vuâđđan lij õnnum eeʹttiǩ-kååʹdd kanslia snimldõõǥǥi ââʹnnem-määinaid.