Muitalus riikkabeivviide
Ođasmahttojuvvon sámediggelága mielde Sámediggi doaimmaha jahkásaččat riikkabeivviide muitalusa, masa čohkkejuvvo áigeguovdilis árvvoštallan sámiid gielalaš ja kultuvrralaš vuoigatvuođaid, iešmearrideami ja eallindiliid ovdáneamis. Muitalus sisttisdoallá Sámedikki evttohusaid lassin viiddis čielggadeami das, mo sámiid vuođđo- ja olmmošvuoigatvuođat leat ollašuvvan muitalusjagi áigge.
Ovddidanevttohusat ja vuoigatvuođaid ollašuvvan
Muitalusa ulbmilin lea nannet riikkabeivviid ja Sámedikki gaskasaš gulahallama, lasihit dieđu sámiid dilis Suomas ja doarjut eamiálbmotvuoigatvuođaid ollašuhttima čuovvuma váldegotti alimus dásiin.
Muitalusas addojit konkrehta doaibmaevttohusat, maiguin eiseválddit ja láhkaaddit sáhttet buoridit sámiid vuoigatvuođaid ollašuvvama.
Riikkabeivviin lea ovddasvástádus sihkkarastit, ahte vuođđolágas ja riikkaidgaskasaš olmmošvuoigatvuođasoahpamušain sihkkarastojuvvon sámiid vuoigatvuođat ollašuvvet maiddái geavadis. Dát eaktuda láhkaásahusa čađaheami aktiivvalaš čuovvuma, doarvái dakkár resurssaid, mat leat ovddalgihtii dieđus ja sámiid iešmearrideami njuolgguslaš gudnejahttima buot almmolaš mearrádusdahkamis.
Muitalusa gieđahallan riikkabeivviin
Sámediggelága mielde viiddiduvvon muitalus doaimmahuvvo jahkásaččat njuolga riikkabeivviide. Muitalussii ii leat mearreáigi, ja dan sáttaságastallama figgat ordnet farggamusat dan maŋŋá go muitalus lea boahtán riikkabeivviide. Muitalus sáhttá gieđahallot vuođđoláhkaváljagottis, ja gieđahalli váljagoddi mearriduvvo sáttaságastallamis ságajođiheaddjiidráđi evttohusa vuođul.
