Hálddahus
Sámedikki čállingoddái gullet golbma doaimmahaga: almmolaš doaimmahat, sámegiela doaimmahat ja skuvlen- ja oahppomateriáladoaimmahat. Stivrenjoavku ovddida ja heiveha oktii čállingotti doaimma. Das leat doaimmahagaid ja ovttadagaid hoavddat. Hálddahushoavda jođiha Sámedikki hálddahusa.
Bargoortnegis, man Sámedikki čoahkkin lea dohkkehan, ásahuvvo ee. Virggiid, iešguđet orgánaid ja daid doaimmaid ja hálddahusmeannudeami birra Sámedikkis.
Almmolaš doaimmahat
Almmolaš doaimmahaga bargun lea dikšut áššiid, mat gusket Sámedikki ruhtadollui, bargiide ja eará almmolašhálddahussii, ja maid eará áššiid, mat eai leat mearriduvvon eará doaimmahagaid bargun.
Almmolaš doaimmahaga oktavuođas doibmet kulturguovddáš Sajosa bálvalanovttadat ja sosiála- ja dearvvašvuođaovttadat ja maid sámi mánáidkulturguovddáš, musihkkaguovddáš ja eamiálbmogiid filbmaguovddáš. Lassin sosiála- ja dearvvašvuođaovttadaga vuolde doaibmá Davvi-Suoma sosiálasuorggi máhttinguovddáža sámeovttadat.
Sámegiela doaimmahat
Sámegiela doaimmahat ollašuhttá sámi giellalágas (láhka 1086/2003, ásahus 108/2004) dárkkuhuvvon bargguid. Dat fuolaha lágas dárkkuhuvvon jorgalusaid doaimmaheamis sierra virgeoapmahaččaide ja lágádusaide, veahkeha virgeoapmahaččaid ja lágádusaid sámegielat tulkkaid skáhppomis ja maiddái sámi giellalágas dárkkuhuvvon eará bargguin sihke čuovvu sámi giellalágas ásahuvvon ulbmiliid ollašuvvama ja bargá dárbbu mielde álgagiid sámegiela geavaheami ovddideapmin. Doaimmahaga hoavdan doaibmá gielladorvočálli.
Skuvlen- ja oahppamateriáladoaimmahat
Skuvlen- ja oahppamateriáladoaimmahat válmmaštallá ja ollašuhttá lávdegotti gieđahallan áššiid. Dat vástida sámegielat oahppamateriála plánemis, válmmašteamis ja juohkimis, sámenuoraid dáiddadáhpáhusa ordnemiin, almmustahttá sámeoahpahusa statistihkaid ja doallá oktavuođa sámeoahpahusa lágideaddji gielddaide ja skuvllaide ja maiddái oahpahusa hálddahussii. Doaimmahat válmmaštallá ja ollašuhttá maiddái sámi skuvlenáššiid ovttasbargoorgána čoahkkimiid áššiid ja oassálastá sámi oahpahushálddahusa davviriikkalaš ovttasbargui. Doaimmahaga hoavdan doaibmá skuvlenčálli.
Doaibmabáikkit
Sámedikki čállingotti váldodoaibmabáiki lea Anáris sámekulturguovddáš Sajosis. Sámedikkis lea siidodoaibmabáiki Heahtás.
