Árrabajásgeassinlávdegoddi
Árrabajásgeassinlávdegoddi doaibmá Sámedikki stivrra vuollásažžan ja vástida sámi árrabajásgeassima ovddideamis ja buorideamis. Lávdegoddi válmmaštallá Sámedikki evttohusaid ja bealleváldimiid, ovddida sámemánáid vuoigatvuođaid iežasgielat árrabajásgeassimii sihke dikšu mearrádus-, čuovvun- ja hálddašanbargguid, mat laktásit sámegielat árrabajásgeassima ja giellabeassedoaimma stáhtadoarjagiidda.
- Sámedikki čoahkkin vállje árrabajásgeassinlávdegoddái válgabadjái ain hávil ságajođiheaddji, várreságajođiheaddji ja vihtta eará lahtu sihke juohkehažžii persovnnalaš várrelahtu.
- Ságajođiheaddji ja várreságajođiheaddji galgaba leat Sámedikki fásta lahtut.
- Lávdegoddi galgá ovddastit Suoma sámiid giella- ja guovllujoavkkuid nu bures go vejolaš sihke buori áššedovdamuša doaibmasuorggistis.
Bargguide gullá
- válmmaštallat válgabadjái ain hávil sámi árrabajásgeassima doaibma- ja ovddidanprográmma njunušulbmiliiguin,
- válmmaštallat Sámedikki evttohusaid, álgagiid, cealkámušaid ja eará bealleváldimiid, mat gusket sámi árrabajásgeassima,
- ovddidit sámemánáid vuoigatvuođaid iežasgielat árrabajásgeassimii sihke buoridit sámi árrabajásgeassima sajádaga Suomas,
- ovddidit sámi árrabajásgeassima davviriikkalaš ovttasbarggu,
- bargat ovttasbarggu álbmotlaš ja riikkaidgaskasaš organisašuvnnaiguin, mat dikšot sámi árrabajásgeassima,
- juohkit dieđuid sámi árrabajásgeassimis,
- geavahit stáhtadoarjjavirgeoapmahažžii gullevaš mearridanválddi ovdalis 4 §:a 13 čuoggás oaivvilduvvon sámegielat árrabajásgeassima ja giellabeassedoaimma ordnema várás dárkkuhuvvon stáhtadoarjagiid geavaheamis ja maiddái vástidit das máinnašuvvon hálddašeapmái gullevaš eará bargguin sihke gieđahallat dárbbu mielde njulgengáibádusaid, mat gusket doarjjamearrádusaide,
- čuovvut ja bearráigeahččat sámegielat árrabajásgeassima ja kultur- ja giellabeassedoaimma ordnema várás dárkkuhuvvon stáhtadoarjagiid geavaheami sihke ráhkadit Sámedikki stivrii jahkásaččat čilgehusa máinnašuvvon stáhtadoarjagiid geavaheamis,
- ráhkadit Sámedikki čoahkkimii evttohusa jahkásaš stáhtadoarjagiin, mat dárbbašuvvojit sámegielat árrabajásgeassima ja sámi kultur- ja giellabeassedoaimma ordnema várás,
- ráhkadit Sámedikki čoahkkimii evttohusa guhkit áigge plánan ovdalis 4 §:a 16 čuoggás dárkkuhuvvon sámi árrabajásgeassinbálvalusaid ordnema várás,
- dikšut doaibmasuorgásis gullevaš eará bargguid.
