Sámi sosiála- ja dearvvašvuođaáššiid ovttasbargoorgána
Sámi sosiála- ja dearvvašvuođaáššiid ovttasbargoorgána lea Sámedikki, sámiid ruovttuguovllu gielddaid, stáhta- ja guovlohálddahusa gaskasaš áššedovdi-, ovttasbargo- ja ráđđádallanorgána. Sámi sosiála- ja dearvvašvuođaáššiid ovttasbargoorgána doaibmá Sámedikki oktavuođas.
Ovttasbargoorgána dárkkuhussan lea ovddidit ovttasbarggu sámi buresveadjináššiin ja ovddidit ovttasbargui oassálasti organisašuvnnaid gaskasaš álbmotlaš ja rájiid rasttildeaddji ovttasbarggu.
Ovttasbargoorgána doaibmá ráđđeaddi orgánan sierra Sámedikki linjáorganisašuvnnas.
Doaimmat
- Ovddidit sámegielat sosiála- ja dearvvašvuođabálvalusaid oažžuma ja ovddideami, nu ahte vuhtiiváldá rádjeovttasbarggu.
- čuovvu ovdáneami ja doaibmá áššedovdin, ja
- dahká evttohusaid ja addá áššedovdicealkámušaid sámiid buresveadjingažaldagaid birra.
Ásaheapmi ja čoahkkáibidju
Sámedikki čoahkkin ásaha ovttasbargoorgána iežas doaibmabaji vástideaddji áigái. Ovttasbargoorgánas lea ovddastus Sámedikkis, sosiála- ja dearvvašvuođaministeriijas, sámi sosiála- ja dearvvašvuođabálvalusaid lágideamis, buvttadeamis ja ovddideamis vástideaddji orgánain ja sámiid ruovttuguovllu gielddain.
Sámedikki čoahkkin nammada orgánii golbma lahtu ovtta guđege giellajoavkkus, eará orgánat nammadit guđege ovtta lahtu. Lassin guđege orgána nammada lahttui persovnnalaš várrelahtu.
Lassin ovttasbargoorgánas sáhttet leat áššedovdilahtut ovttasbargoorgána mearridan vugiin.
Ovttasbargoorgána ságajođiheaddjin ja várreságajođiheaddjin doaibmaba lahtut, geaid Sámediggi lea nammadan. Ovttasbargoorgána čállin doaibmá Sámedikki sosiála- ja dearvvasvuođačálli.
