Almottâttâm Säminuorâi taaiđâtábáhtusân álgá
Almottâttâm Säminuorâi taaiđâtábáhtusân 19.5.2026 lii ávusin 17.3.-13.4.2026. Tábáhtusân kalga almottâttâđ Webropol-ohjelm pehti.
Kuva: Saamelaiskäräjät / Tuuli Paadar.
Säminuorâi taaiđâtábáhtus tuálloo majebaargâ 19.5.2026 tme 10.00 rääjist Kärigâsnjaargâ škoovlâst. Taaiđâtábáhtus lii taan ive oovtâ peeivi kukkosâš.
Tábáhtusân pyehtih uásálistiđ vuáđuškoovlâ já nube tääsi sämimáttááttâsâst orroo 6–20-ihásiih párnááh já nuorah. Ahejuávhuh iä lah. Taaiđâtábáhtus kiellân láá nuorttâlâš-, anarâš- já orjâlâškielâ. Ko oovdânpyehtimijn láá kiävtust tuš mikrofoneh, te sierâ sound check ij lah. Juávhust tâi uáppest lii máhđulâšvuotâ uásálistiđ maaŋgâ taaiđâsuárgán.
Sämitigge uárnee sáátuid já purâdem peeivi ääigi. Sáátuh kyeskih vuosâsaajeest sämmilij päikkikuávlu škoovlâi sämiluokkalijd sehe sämikielâi uáppeid. Kuhes määđhi keččin puátteid uárnejuvvoo ijjâdem, tárbu árvuštâlloo škoovlâi mield. Taaiđâtábáhtusân váldojeh enâmustáá 300 olmožid, mutâ tot vuolgâttuvvoo stream peht, kuás puoh, kiäh halijdeh, pasteh čuávvuđ tom jieijâs škoovlâst.
Taaiđâtábáhtus teemah
Mainâstem (pištem 3 min)
Maainâs lii ärbivuáválâš tâi páihálâš, tábáhtum kuásnii tovle tâi merhâšittee tuu jieijâd kuávlust tâi sämmilii mainâstemärbivyevist. Maainâstmist lii tehálâš väldiđ vuotân kuldâleijeid. Jienâ, tiäduttem, puudah, já mainâs siskáldâs mainâstuvvoo sämikielân.
Maainâs oovdânpuáhtoo videon já tot kovvejuvvoo puhelimáin tâi tabletáin. Video puáhtá leđe ciäggud tâi viällud. Video tiätuvuárkkáhäämi kalga leđe .MP4 tâi .MOV. Video vuolgâttuvvoo muuneeld 30.4.2026 räi čujottâsân tarja.porsanger@samediggi.fi.
Jienâmaailm (pištem 3 min)
Jienâmaailm vuáđuduvvoo sierâlágán jienâi peht. Riitmâ, ulmuu jienâ, elektroonlij jienâi, luándu jienâi já joba čuojânâsâi kevttim lii máhđulâš. Sierâlágán jienâi oohtânheiviittem ráhtá jienâmaailm, mii lii sierâ maainâs tâi máhđulâš uási kuvâttâllum muusikoovdânpyehtimist. Jienâmaailm oovdânpuáhtoo läävdi alne taaiđâtábáhtusâst, uási jienâmaailmist puáhtá leđe rahtum muuneeld (om. muštosäägist).
Ärbivuáválâš livđe, leudd, luohti (5–10 min)
Ärbivuáválâš sämmilâš vookaalmuusik puáhtá siskeldiđ oovtâ tâi maaŋgâ juáigus, livđe tâi leudd, kuittâg adelum ääigi siste. Oovdânpyehtim juávkkun tâi ohtuu. Oovdânpyehtimist ij lah čuojâldittem, mutâ rumbu tâi uccâ ritmâčuojânâsâi kevttim lii máhđulâš.
Tyeji, tuejj, duodji
Tyejeest lii kyehti kategoria, uásálistee uásálist tuš nuubán:
- Ärbivuáválâš tyeji, mon stivrejeh materialeh, häämi, ivneh, kiävttutárguttâs já tot, ete tyejeest uáiná, ete tot lii kieđâi tuoijum.
- Tyeje uđđâ eellim, mii puáhtá leđe uđđâsist hämmejum, uđđâ hutkos, äigikyevdil, tivvum tâi pele väldee.
Tyejeest vuolgâttuvvoo kove muuneeld 30.4.2026 räi čujottâsân tarja.porsanger@samediggi.fi. Tyejeh puáhtojeh taaiđâtábáhtusân, mast toh piäijojeh uáinusân. Tuáján kalga pieijâđ tuáijár tiäđuid (nommâ, ahe já škovlâ).
Almottâttâm
Almottâttâm lii áávus 17.3.-13.4.2026 Webropol-ohjelmist.
Liŋkkâ almottâtmân: https://link.webropol.com/s/taidetapahtuma2026
Pyevtittâstiimi
Minna Lehtola
044 902 9295
minna.lehtola@samediggi.fi
Petra Biret Magga-Vars
040 732 5503
petra.magga@samediggi.fi
Tarja Porsanger
050 569 6065
tarja.porsanger@samediggi.fi
