Sämikielah uáinojeh já kullojeh Kielâohhoost – puáđi mieldi!
Kielâokko viättoo jyehi ive roovvâdmáánust ohhoost 43, taan ive 20.-26.10. Sämitigge puávdee puohâid mieldi pyehtiđ uáinusân Euroop Union áinoo algâaalmug, sämmilij, Suomâst ellee kielâid – anarâškielâ, nuorttâlâškielâ já tavesämikielâ. Máttááttâsminister Anders Adlercreutz tuáimá taan ive Kielâoho suojâleijen.
– Ko mij kevttip sämikielâid nuuvt ennuv ko máhđulâš, mij lasettep toi oinum já áárvustanneem. Veikâ jieh jieš mátáččii sämikielâ, te tun puávtáh kuittâg leđe mieldi tuárjumin kielâ já kulttuur – ávus mielâ já uceh-uv tavoh merhâšeh ennuv, iätá Sämitige saavâjođetteijee sajasâš Tuomas Aslak Juuso.
Mondiet uásálistiđ?
- Sämikielah láá ellee, mutâ uhkevuálásâš kulttuurärbi. Kielâlâš oinum naanood toi eellimvuáimálâšvuođâ.
- Uásálistem lii taho algâaalmugij vuoigâdvuođâi tuárjum pyerrin já meerhâš čonâdâttâm oovtâviärdásâšvuotân.
- Sämikielâi tuárjum muštâl siärvuslâšvuođâ já páihálâšvuođâ áárvustanemist sehe árvujoođeetmist.
- Juáhháást lii máhđulâšvuotâ leđe mieldi huksiimin Suomâ, mii lii kielâlávt já kulttuurlávt oovtâviärdásâš.
Maht tun puávtáh uásálistiđ?
Toimâ puáhtá leđe uccâ já symbollâš tâi vijđásub já utkáá – tehálumos lii, ete tot kunnijât já kuldâl sämisiärváduv jienâ. Taa motomeh ideah:
- Pyevti sämikielâid uáinusân jieijâd nettisiijđoin, äššigâsviestâdmist, koolbâin tâi almottâstaavluin.
- Jyevi peeivi sämikielâlii sääni tâi tiervâttâs somest.
- Ornii uccâ tábáhtus, tiäđáttâs, oovdânpieijâm tâi kampanja sämikielâi kunnen.
- Keevti tobdonoomâ #giellavahkku, #kielâokko tai #ǩiõllneä’ttel, ko uásálistáh.
- Tun kaavnah material já lasetiäđuid nettisiijđoin: Kieliviikko, Giellavahkku, Giellavahkku FB ja Giellavahku Instagram.
Mii lii kielâokko?
Säämi kielâoho ulmen lii pyehtiđ sämikielâid kullojeijen já uáinojeijen ohtsâškode puoh suorgijn Suomâst, Ruotâst já Taažâst. Kielah láá teháliih ovtâskâs kielâkevttei, sämiaalmugân já oles syemmilii ohtsâškoodán – toh láá viestâdemniävuh, identiteet já kulttuuräärbi kyeddeeh já oohtânkulluuvâšvuođâ huksejeijeeh.
Sämikielâi oinum argâpeeivist naanood toi sajattuv já tuhhiittem ohtsâškoddeest. Okko lii uárnejum ive 2019 rääjist, kuás viettui OA aalmugijkoskâsâš algâaalmugij kielâi ihe. Sämitigge olášut oho oovtâstpargoost Ruotâ já Taažâ Sämitigijguin.
Lasetiäđuh:
Tuomas Aslak Juuso
Saavâjođetteijee sajasâš
Sämitigge
tuomas.juuso@samediggi.fi
040 687 3394
Iše uásálistem vuáváámân:
Marko Marjomaa
Säämi kielâašijčällee
Sämitigge
marko.marjomaa@samediggi.fi
+358 50 438 2484
