Sämitigge aalgât EU-uulmij ovdedem – ovdâsteijeeh taan ohhoost Brysselist teivâdmin EU toimâorgaanij ovdâsteijeid
Sämitige ovdâsteijeeh mađhâšeh vyesimáánu 13.-16. peeivi Brysselân ovdediđ Sämitige EU-politiikân lohtâseijee uulmijd. Kollim ääigi ovdâsteijeeh teivâdeh EU toimâorgaanij ovdâsteijeid já čonâsjuávhuid.
Bryssel määđhi tárguttâssân lii porgâškyettiđ Sämitige EU-ulmijguin, moh lohtâseh šoŋŋâdâhnubástusân, eellimvuáimán já uásálâšvuotân. Sämitige ovdâsteijeeh teivâdeh staatârääđi kanslia EU-uásáduv Helsigist, ovdil ko vyelgih Brysselân. Brysselist teivâdmeh láá ei. Suomân EU-ovdâstâssáin, Euroop komissioin já Euroop parlament syemmilâšairâsijguin ađai mepijguin.
Veikâ miärádâsah, moh tahhojeh EU:st, vaigutteh sämmilij jyehipiäiválij elimân, sämmilijn ij kuittâg lah virgálâš sajattâh EU miärádâstohâmist ige pisovâš ovdâstâs Brysselist. EU:st ij meid lah virgálâš siskáldâs algâaalmugpolitiik.
– Sämitige tievâsčuákkim lii miäruštâllâm taan valjâpajan prioriteetin vaikuttem EU suundán. Mii ulmen lii taan määđhist savâstâlškyettiđ tast, maht mij puávtáččijm konkreetlávt ovdediđ sämmilijd tehálijd aašijd EU-tääsist, iätá saavâjođetteijee sajasâš Tuomas Aslak Juuso.
– Mij vyerdip positiivlii vuástáväldim já tom, ete mij pyehtip oovtâst tubdâđ ohtsijd laavhijd puátteevuotân, Juuso juátká.
Sämitige delegaatiost láá mieldi saavâjođetteijee sajasâš Tuomas Aslak Juuso, I värisaavâjođetteijee Leo Aikio, stiivrâ jesâneh Tauno Ljetoff já Asko Länsman, iäláttâs- já vuoigâdvuotâlävdikode saavâjođetteijee Nilla Tapiola, lahâčällee Kalle Varis, aalmugijkoskâsij aašij čällee Inka Saara Arttijeff já saavâjođetteijee išedeijee Niina Siivikko.
EU-ääših Sämitige aalmugijkoskâsii tooimâ kuávdáást
Sämitigge lii linjám taan valjâpaje aalmugijkoskâsii tooimâ kuávdášlâžžân ulmen Sämitige uásálistemvuoigâdvuođâi nanodem já vuáháduttem Euroop union instituutioin sehe EU-miärádâstohâmân uásálistem Suomâst. Ive 2025 toimâvuáváámist ohtân njunošulmen lii: ”Sämmilij uásálistemvuoigâdvuođah EU:st já EU:n kyeskee miärádâstohâmist: pisovij ráhtusij ovdedem”.
Sämitige EU-politiikân lohtâseijee ulmeh láá čallum kuulmâ váldu-ulme vuálá:
- Uásálistem nanodem
- Šoŋŋâdâhnubástus
- Sämikuávlu eellimvyeimi
Sämitige já Säämi parlamentaarlii rääđi ulmeh láá linjáást Brysselist njuhčâmáánust 2023 uárnejum Barents kuávlu algâaalmugij njunoščuákkim puátusijguin.
- Sämitige valjâpaje toimâohjelm 2024–2027 (pdf suomâkielân)
- Sämitige toimâvuávám ihán 2025 (pdf suomâkielân)
- Sämitige aalmugijkoskâsii tooimân kyeskee strategia (pdf suomâkielân)
Lasetiäđuh:
Tuomas Aslak Juuso
Saavâjođetteijee sajasâš
040 687 3394
tuomas.juuso@samediggi.fi
Inka-Saara Arttijeff
aalmugijkoskâsij aašij čällee
050 574 7629
inka-saara.arttijeff@samediggi.fi
