Sämitigge ij tuhhit hiäjusmitmijd sämikielâláid tâi sämmilij päikkikuávlu soti-palvâlussáid

Šiäštutooimâin oovdânpuáhtoo ei. Muonio seŋgâuásáduv lopâttem, pääihist tâi päikkipirrâsist adelum spesiaalpyecceetipšo čokkim, Käresavvoon tiervâsvuotâsajattuv piäiválii tooimâ lopâttem sehe Avveel ijâppiäiválii kocceem muttem huápulâžžân vuástáväldimin, kuás mätki sämmilij päikkikuávlu tavemuin oosijn ijâppiäiválii kocemân ličij aldasáid 500 km.

– Šiäštutooimah, moh čyeccih sämmilij päikkikuávlun tâi moi vaikuttâsah čyeccih toos, oroh lemin merettemeh, ko váldá huámmášumán sämiaalmug jo tääl orroo hiäjub sajattuv sosiaal- já tiervâsvuotâhuolâttâsâst. Palvâlusâi kepidem vaaikut njuolgist ulmui torvolâšvuođâ vuáttámuššáid já mij turvâstep Laphan, ete tot kiäsá meddâl taid iävtuttâsâid, paahud Sämitige saavâjođetteijee sajasâš Tuomas Aslak Juuso.

Sämitigge muštoot, ete soti-uđâsmtitem ohtân váldu-ulmen lâi oovtâviärdásâšvuođâ pyeredem. Kuávlulii juksâmvuođâ hiäjusmittem toovât eidu nubelágán vaikuttâs já keeppid ulmui luáttámuš ohtsâškode palvâlussáid. Palvâlusâi sirdem meddâl sämmilij päikkikuávlust hiäjusmitáččij njuolgist meid máhđulâšvuođâ kevttiđ palvâlusâid sämikielân eereeb iärrás hástusij tiet, maid pargei finnim toovât.

Sämitigge meid huámmášut, ete Laapi pyereestvaijeemkuávlun kyeskih sämitiggelaavâ (414/2025) 9 § já 9a § miäldásiih kenigâsvuođah. Tääl šiäštutooimah láá valmâštâllum nuuvt, ete ij lah lamaš mihheen oovtâsttoimâmijd tâi ráđádâlmijd Sämitiggijn.

– Sämitigge ličij kolgâm valduđ mieldi jo valmâštâllâmmuddoost. Eidu uđâsmittum sämitiggelaahâ torvee ráđádâlmij olášuttem pyerebeht, ij hiäjubeht. Mun anam taam eromâš tuođâlâžžân äššin já mij kolgâp kuorâttâllâđ jotkâtooimâid ääšist, juátká Juuso.

Sämitigge meid tuurvâst Suomâ staatân, vâi tot kuáddá jieijâs ovdâsvástádâs sämmilij palvâlusâin ige vájáldit sämiaalmug massiivlij šiäštutooimâi ooleest.

Lasetiäđuh

Tuomas Aslak Juuso
Saavâjođetteijee sajasâš
040 687 3394
tuomas.juuso@samediggi.fi