Sämitigge uárnee savâstâllâmrááiđu nuorttâlâškielâ tiileest
Sämitigge puávdee savâstâllâđ nuorttâlâškielâ tiileest já oovdedmist. Savâstâlmij ulmen lii nuurrâđ oohtân sierâ tuáimeid smiettâđ čuávdusijd, moiguin kielâ tile puávtáččii pyerediđ oovtâstpargo já jo orroo resursij vievâst. Savâstâlmeh viggeh kavnâđ čuávdusijd já keččih puátteevuotân. Táárbu mield fáádá kieđâvuššâm aalgâst kärttejuvvoo tááláš tile.
Kove: Tarmo Lehtosalo / Nuorttâlâškulttuursiäđus.
Mij tuáivup savâstâlmáid fáárun tuáimeid, kiäh láá perustum nuorttâlâškielâ tile oovdedmist tâi pargeh kielân lohtâseijee ašijguin. Meid nuorttâlâškielâlij palvâlusâi kevtteeh, kielâ sárnooh já ovtâskâs ulmuuh láá tiervâpuáttim.
Savâstâllâmráiđu lii uási Sämitige kielâpooliitlii toimâ- já ovdedemohjelmist ivvijd 2025–2027. Sämitige tievâsčuákkim lii asâttâm valjâpaje kuhes áigáduv toimân nuorttâlâškielâ iäláskittem, nanodem já ovdedem. Sämitige uáinu mield nuorttâlâškielâ tile spiekâst anarâš- já orjâlâškielâ tiileest já váátá eromâš tooimâid iäláskitmân. Hástusin lii aiccum tot, ete nuorttâlâškielâ iäláskittem tâi vijđásubbooht kielâvuávám ij koordinist mihheen peelijd systemaatlávt. Tondiet Sämitigge haalijd tääl povdiđ sierâ tuáimeid savâstâllâđ tast, maht nuorttâlâškielâ iäláskittempargoost puávtáččii ovdániđ. Čäällip savâstâlmijn muštottemčálusijd, moi vuáđuld juátkip nuorttâlâškielâ ovdedempargo Sämitiggeest.
Vuossâmužžân já tehálumosin fáddán valmâštâllâmpargoost onnui nuorttâlâškielâ arâšoddâdem já máttááttâs tile ovdedem. Fáádáid lep valjim Sämitige, Nuorttâlij sijdâčuákkim já Nuorttâlâškulttuursiättus koskâsijn algâmudo savâstâlmijn. Vuoluubeln láá tiäđuh fáádáin já servâmliiŋkah. Savâstâlmáid uásálistmân ij taarbâš almottâttâđ sierâ, spiekâstâhhân aldateivâdem, mii uárnejuvvoo Čevetjäävrist. Peividep tiäđáttâs tađe mield, ko tiäđuh puoh sárnoin visásmuveh.
Savâstâlmij fáádáh:
1. Nuorttâlâškielâlâš arâšoddâdem
29.4.2025 tme 14.30–16.00 Teams peht: Servâmliŋkkâ
Savâstâlmin Aanaar kieldâ arâšoddâdemhovdâ Pirkko Saarela, arâšoddâdemohtâduv hovdâ Krista Leivo já Sämitige arâšoddâdemstivrejeijee Niina Aikio-Siltala. Savâstâllâm stivree Sämitige kielâtorvočällee Anne Kirste Aikio.
2. Nuorttâlâškielâlâš vuáđu- já luvâttâhmáttááttâs
19.5.2025 12–14 Teams peht: Servâmliŋkkâ
3. Kielâteknologia
11.6.2025 14–16 Teams peht: Servâmliŋkkâ
4. Kielâpiirâs
4.9.2025 18–20 Aldateivâdem Čevetjäävrist.
Lasetiäđuh já almottâttâmliŋkkâ lasettuvvoo maŋeláá.
Fáádást uárnejuvvoo meid nubbe aldateivâdem čohčâmáánu ääigi, äigi já päikki almottuvvoo maŋeláá.
5.Konkreetlij kielâpirrâsij ovdedem
7.10.2025 12–14 Teams peht: Servâmliŋkkâ
Savâstâlmeh uárnejuvvojeh oovtâstpargoost Nuorttâlij sijdâčuákkimáin já Nuorttâlâškulttuursiättusijn.
Lasetiäđuh:
Anne-Kirste Aikio, kielâtorvočällee
anne-kirste.aikio@samediggi.fi
Marko Marjomaa, kielâašijčällee
marko.marjomaa@samediggi.fi
Niina Aikio-Siltala, kielâpiervâlstivrejeijee
niina.aikio-siltala@samediggi.fi
