Sämitigge váátá sämikielâlij já sämmilij päikkikuávlu soti-palvâlusâi turvim
Laapi pyereestvaijeemkuávlu palvâlusviärmádâhân kyeskee vuáváámeh vaikutteh merhâšitteht sämiaalmug pyereestvajemân já tiervâsvuotân sehe máhđulâšvuođáid paijeentoollâđ já ovdediđ jieijâs kielâ já kulttuur. Sämitiggelaavâ 9 § miäldásiih ráđádâlmeh pyereestvaijeemkuávloin juátkojeh algâivveest 2026 ovdil miärádâstoohâm.
Kove: Ville Fofonoff / Sämitigge
Laapi pyereestvaijeemkuávlu almostitij 22.10.2025 hammiittâs palvâlusviärmáduv nubástusâin ekonomia heiviittemtooimâi uássin. Hammiittâsâst lii oovdânpuohtum ei. Avveel ijâppiäiválii kocceem sajan huáppuvuástáväldim, Muonio seŋgâuásáduv lopâttem já kylái palvâlusâi hammim.
– Mij halijdep visásmittiđ, ete sämikielâliih já sämmilij päikkikuávlu soti-palvâlusah siäiluh. Mij lep-uv Sämitiggeest viggâm vaikuttiđ áášán maaŋgânáál, vâi taah eellimteháliih palvâlusah torvejuuččii, iätá Sämitige saavâjođetteijee sajasâš Tuomas Aslak Juuso.
Sämitigge lii uásálistám áášán kyeskee almos savâstâlmân väldimáin pele 22.10.2025, uáivilčalluin 5.11.2025 já ohtsijn uáivilalmottâssáin Iänuduv, Aanaar já Ucjuv kieldâiguin. Ääši ooleest láá meid oovtâst kieldâiguin teivâm uáiviminister Orpo sehe kieldâ- já kuávluminister Ikosii sierânâsišedeijeid 27.11.2025.
Sämitige stivrâ kieđâvušâi ääši čuákkimist 19.11.2025 já tuhhiittij Sämitige ciälkkámuš palvâlusviärmáduv nubástusâin. Ciälkkámušâst ei. lâi áánnum sämikielâlij já sämmilij päikkikuávlu soti-palvâlusâi turviimân sehe puohtui oovdân, ete Sämitigge ij tuhhit Muonio seŋgâuásáduv ige Avveel ijâppiäiválii kocceem lopâttem. Sämitigge táátui Laapi pyereestvaijeemkuávlu luoppâđ tagarijn vuáváámijn, moh ovdiist eenâb hiäjusmitáččii sämikielâlij palvâlusâi olášume.
Lasseen táátui pyereestvaijeemkuávlust vijđásub vaikuttâsâi árvuštâllâm ovdil miärádâstoohâm já muštottij sämitiggelaavâ kenigâsvuođâin.
Sämitigge lii jo ovdil adelâm Laapi pyereestvaijeemkuávlun kriitiik tast, ete Sämitigge ij lah valdum fáárun palvâlusviärmáduv nubástusâi valmâštâllâmprosesân. Laapi pyereestvaijeemkuávlu povdij Sämitige sämitiggelaavâ 9 § miäldásii ráđádâlmân, mii tollui 25.11.2025. Ráđádâlmijn ellii čoođâ ei. ráđádâllâmiävtuid. Ráđádâllâm ääigi Laapi pyereestvaijeemkuávlu almottij, ete palvâlusviärmádâhân kyeskee miärádâsah tahhojeh eskân algâivveest 2026. Oovtâsttoimâm- já ráđádâllâmproosees Sämitige já Laapi pyereestvaijeemkuávlu kooskâ juátkoo algâivveest 2026 ovdil miärádâstoohâm.
Lasetiäđuh
Tuomas Aslak Juuso
II värisaavâjođetteijee, saavâjođetteijee sajasâš
040 687 3394
tuomas.juuso@samediggi.fi
