Ávus reivâ: Sämikielâlij já sämmilij päikkikuávlu palvâlusâi turvim Laapi pyereestvaijeemkuávlust
Sämitigge lii toimâttâm Laapi pyereestvaijeemkuávlu merideijeid ávus reeivâ, mast pivdoo turviđ sämikielâlijd já sämmilij päikkikuávlu sosiaal– já tiervâsvuođâhuolâttâs palvâlusâid kuáhtulii määđhi keččin. Sämitigge lii ovdil-uv puáhtám oovdân tuođâlii huolâs ekonomia heiviittemtooimâi vaikuttâsâin kuávlu eellimteháláid palvâlussáid.
Kove: Ville Fofonoff
Eromâš huolâ láá tovâttâm vuáváámeh kiddiđ Muonio seŋgâuásáduv já joskâđ Avveel ijâppiäiválii kocceem. Kuohtuuh palvâlusah láá teháliih peic kuávlu puoh ässeid, te meid eromâšávt sämiaalmugân kuhes maađhij já sämikielâlij palvâlusâi keežild.
Sämitigge ana tehálâžžân, ete kuávlustivrâ meridij 9.2.2026 čuákkimist iävtuttiđ ete kuohtuuh palvâlusah juátkojeh. Miärádâs čáittá ibárdâs kuávlu sierânâsjiešvuovijn sehe ässei táárbuin.
– Kuávlustivrâ lii toohâm vijđáht vaigutteijee tehálii linjim, mon mij tuáivup, ete kuávluváldustivrâ puáttee oho čuákkimist tuárju. Muonio seŋgâuásádâh já Avveel ijâppiäiválâš kocceem láá eellimteháliih palvâlusah, moi joskâm hiäjusmitáččij sehe pyecceetorvolâšvuođâ já meid torvolâšvuođâ tobdo, iätá Sämitige saavâjođetteijee sajasâš Tuomas Aslak Juuso.
Huolâ meid eres palvâlusâin
Ávus reeivâst puáhtoo oovdân, ete heiviittemvuáváámijn láá eres-uv palvâlusah, moh láá sämmilij tááhust kriittâliih, já main ij lah ennuv almolávt savâstâllum. Ohtâ tain lii Käresavvoon tiervâsvuotâsajattuv piäiválii tooimâ joskâm, mon Sämitigge ij tuhhit. Eromâšávt äššigâsjuávhoid, kiäh tarbâšeh palvâlusâid merikoskâsávt, juvsâttettee tiervâsvuođâhuolâttâs palvâlusah láá velttidmettumeh, já kuhes määđhih pyehtih tovâttiđ merhâšittee estuid palvâlussáid ucâluumân.
Sämitigge muštoot, ete meid päikkikuávlu eres kylái palvâlusâid kalga turviđ, tastko toh láá teháliih peic ulmui pyereestvajemân te meid sämikielâi já -kulttuur siäilum já kuávlui eellimvyeimi tááhust. Palvâlusâi vuáváámist kalga väldiđ vuotân kuávlui ässei táárbuid já Sämitige kalgeh väldiđ fáárun oovtâstpaargon, tego lahâasâttem váátá.
Oovtâviärdásiih palvâlusah oovtâstpargoost
Soti-uđâsmittem ulmen lii lamaš pyerediđ palvâlusâi oovtâviärdásâšvuođâ já juvsâttetteevuođâ. Sämitigge lii kiärgus puátteevuođâst-uv noonâ oovtâstpaargon, vâi taah prinsiipeh olášuuččii oles Laapi pyereestvaijeemkuávlu kuávlust – meid tain kyláin já siärvusijn, moh älkkeht pääcih kuávdái suoivui.
Lasetiäđuh:
Tuomas Aslak Juuso
Saavâjođetteijee sajasâš
040 687 3394
tuomas.juuso@samediggi.fi
