Eettisávt kilelis algâaalmugmađhâšem oovdân Anarist
Euroop vuossâmuš algâaalmugmađhâšemkonferens EITC 2025 uárnejuvvoo Anarist 20.-22.5.2025. Konferens vuáju eettisávt kilelis algâaalmugmaađhâšmân.
Sämitige stiivrâ jeessân Tauno Ljetoff toolâi konferens tiervâpuáttimsahâvuáru. Kove: Sämitigge / Johanna Alatorvinen.
Sämitige stiivrâ jeessân Tauno Ljetoff leehâi konferens koskoho 21.5. já pahudij, maht mađhâšem lii tääl maaŋgâ sämmilâžân-uv tehálâš áigápuáđu käldee, já tot hárjuttuvvoo távjá paldluvâi ärbivuáválij iäláttâsâiguin. – Ärbivuáválij iäláttâsâi já mađhâšem oohtân heiviittem lii tehálâš, já mun oskom, ete sertifisistempargoin mij pastep ovdediđ ovdiist pyerebijd toimâvuovijd, iätá Ljetoff.
Ljetoff puovtij tiervâpuáttimsahâvuárustis oovdân, maht ovdâsvástádâslii sämimađhâšem sertifikaat lii puohâi hiätu, tastko tot naanood sehe sämikulttuur, Säämi luándu, já oles sämisiärvus. Siämmást tot meid täähid puoh tääbbin kuállejeijeid tom, maid sij kolliimist táválávt enâmustáá tuáivuh: eenâb puigâ já siämmást sämisiärvusân já luándun kilelub vuáttámuš.
– Sertifikaatpargo tárguttâssân lii eromâšávt toohâđ sämimađhâšem tááláá tiileest čielgâsub, vâi mij pyehtip pyerebeht tuárjuđ peelijd, moh tuáimih riävtui já kilelis vuovvijn. Eromâš tehálâš mijjân lii tiäđust-uv nanodiđ sämmilij jieijâs toimâmnaavcâid mađhâšemsyergist, tiäddut Ljetoff.
Algâaalmugmađhâšemkonferens uárnejeh oovtâst World Indigenous Tourism Alliance (WINTA), Sämitigge já Laapi ollâopâttâh. Majebaargâ 20.5. konferens algâttij tutkâmsymposium, mon fáddán lâi mađhâšem já algâaalmugij kulttuurärbi. Koskoho 21.5. já tuorâstuv 22.5. konferensist kieđâvuššojeh eettisávt kilelis algâaalmugmađhâšem vuáháduvah. Täärhib fáddán láá sertifikaateh, moh kiävttojeh maađhâšmist, kilelis mađhâšem já algâaalmugmađhâšem vyebdim já markkânistem. Máttááttâs- já kulttuurministeriö lii mieđettâm eromâštorjuu konferens ornim várás. Uáppáásm tärhibeht konferens ohjelmân taa.
Sertifikaatpargo vievâst toorjâ sämmilij irâtteijei kištottâllâmnavccáid
Sämitige čiččâd sämimađhâšemhaahâ, Vyesi mätki ađai Ovdâsvástádâslii sämimađhâšem sertifikaat: toimâmaali já digitaallii uuccâmsiijđoi ovdedem, vuáju ovdâsvástádâslii sämimađhâšem sertifisistempaargon. Sertifikaat ulmen lii pajediđ oovdân ovdâsvástádâslijd já eettisávt kilelijd sämituáimeid já -pyevtittâsâid, já návt tuárjuđ toimâmpirrâs, mii pyereed sämmilij irâtteijei kištottâllâmnaavcâid. Haavâ olášuttemäigi lii 11.7.2024-30.6.2025 já haavâ lii ruttâdâm Euroop union – NextGenerationEU.
Koskoho 21.5. konferensist oovdânpuohtii hammiittâs uđđâ sertifikaatist ovdâsvástádâslijd já eettisávt kileláid sämmilijd mađhâšemirâttâssáid, moh tuáimih Suomâst. – Tääl ovdâsvástádâslii sämimađhâšem sertifikaat kritereh láá kommentistemrieggest já talle toh maneh Sämitige iäláttâs- já vuoigâdvuotâlävdikode kieđâvušmân. Sämitige stivrâ kieđâvuš vala kriterijd ovdilgo toh maneh Sämitige čuákkimân tuhhiittemnáál, muštâl haavâ vuávájeijee Kirsi Suomi.
Sämitigge lii ovdâlist finnim máttááttâs- já kulttuurministeriöst staatâtorjuu kuuđâ sämimađhâšemhaahân. Tai haavâi ääigi láá eereeb iärrás rahtum Ovdâsvástádâslii já eettisávt kilelis sämimađhâšem toimâprinsiipeh, maid Sämitigge tuhhiittij čuákkimstis čohčâmáánust 2018 sehe Ovdâsvástádâslii mađhâšeijee ravvuuh sämikulttuurân já sämmilij päikkikuávlu maailmân, mii almostui 16.5.2022.
Lasetiäđuh:
Kirsi Suomi
Vuávájeijee, Vyesi mätki – Ovdâsvástádâslii sämimađhâšem sertifikaat -haahâ
040 594 5492
kirsi.suomi@samediggi.fi
