Sämitigge já Digi- já aalmugtiätuvirgádâh nanodeh oovtâstpargos: Suomi.fi räđđee puátteevuođâst pyerebeht sämikielâlij palvâlusâi olán
Sämitige já Digi- já aalmugtiätuvirgáduv (DAV) ovdâsteijeeh teivâdii Anarist porgemáánu loopâst. Teivâdem fáddán lâi oovtâstpargo fastâdem já säämi kielâlaavâ olášume DAV palvâlusâin.
Suomi.fi-sijđoid ráhtoo palvâlususâttâh sämikielâlijn palvâlusâin
Sämitige, DAV já Mij oovtâst -viärmáduv ovdebij savâstâlmij puáđusin DAV lii jo vuávámškuáttám Suomi.fi-sijđoid palvâlususâttuv anarâš-, nuorttâlâš- já orjâlâškielâlijn palvâlusâin. Lii tárguttâs, ete palvâlususâttâh almostittoo ive 2026 ääigi.
DAV paijeentoollâm Suomi.fi-siijđoh láá uuccâmsiijđoh, moh išedeh já rävvejeh aalmugjesânijd já irâttâsâid argâpiäiválij aašij hoittáámist virgeomâháiguin já almoshiäđulij ornijdumijguin. Tuoivân lii, ete uđđâ palvâlususâttâh älkkeedit sämisiärvus máhđulâšvuođâ kavnâđ oovtâ saajeest tiäđuid sierâ virgeomâhái sämikielâlijn palvâlusâin já lasseet sämikielâlij palvâlusâi kevttim.
Teivâdmeh puátteevuođâst merikoskâsávt
Teivâdmist soppii meid Sämitige já DAV oovtâstpargo fastâdmist já jyehi-ivvááš teivâdmijn. Sämitigge lii tolebáá sooppâm oovtâstpargo fastâdmist Kelain já THL:in.
– Mij lep váldám iloin vuástá DAV almottâs Suomi.fi-nettipalvâlus puáttee sämikielâlij palvâlusâi usâttuvâst. Taat konkreetlâš toimâ puáhtá noonâ osko oovtâstpaargon já toos, ete DAV:st kávnoo táttu sämikielâlij palvâlusâi oovdedmân. Sämitigge avžuut virgeomâháid ráhtádâttâđ rähtiđ kuvviimijd jieijâs sämikielâlijn palvâlusâin palvâlustiäturáájun sämikieláid, iätá Sämitige saavâjođetteijee sajasâš Tuomas Aslak Juuso.
– Suomi.fi lii šiev vuáđu sämikielâlij palvâlusâi čokkiimân. Almos haldâttuv palvâlusâi sämikielâlijd oovdânpyehtimijd já kuvviimijd lii puátteevuođâst älkkeb kavnâđ oovtâ saajeest. Mij meid lasettep DAV jieijâs palvâlusâi sämikielâlij kuvviimij falâlduv, muštâl pajehovdâ Timo Salovaara Digi- já aalmugtiätuvirgáduvâst.
Teivâdmân uásálistii Digi- já aalmugtiätuvirgáduvâst uáivihovdâ Janne Viskari, pajehoovdah Timo Salovaara, Pekka Rehn já Noora Kallio sehe viestâdem- já markkânistemhovdâ Anna-Riitta Lund. Sämitiggeest mieldi lijjii saavâjođetteijee sajasâš Tuomas Aslak Juuso, kielâtorvočällee Anne Kirste Aikio já kielâašijčällee Marko Marjomaa.
Digi- já aalmugtiätuvirgádâh oovded ohtsâškode digitalisistem, torvee tiäđui finnimvuođâ já fáálá palvâlusâid äššigâsâi eellimtábáhtussáid. Tot ana huolâ ohtsâškode vuáđustâssân orroo aalmugtiätuoornig paijeentolâmist. Virgádâhân heiviittuvvoo säämi kielâlaahâ já sämmilijn lii vuoigâdvuotâ kevttiđ sämikielâid ášástâldijnis.
Sämitigge lii sämmilij virgálâš ovdâsteijee. Tot oovdânpuáhtá sämmilij virgálii uáinu já ráđádâl virgeomâháiguin. Sämitigge paijeentuálá já oovded puoh kulmâ Suomâst ellee sämikielâ, sämmilij puoh ärbivuáválijd iäláttâsâid sehe sehe sämmilii kulttuur já eellimvyevi.
Lasetiäđuh:
Saavâjođetteijee sajasâš Tuomas Aslak Juuso, Sämitigge
Pajehovdâ Timo Salovaara, Digi- já aalmugtiätuvirgádâh
