Sämitigge ocá värisaavâjođetteijee sierânâsišedeijee
Sämitigge almoot uuccâmnáál II värisaavâjođetteijee sierânâsišedeijee meriáigásii pargo.
Uđâsmittum sämitiggelaavâ mield Sämitige värisaavâjođetteijeeh tuáimih pargostis váldutoimâlávt. Saavâjođetteijeejuávkun pálkkááttuvvoo kuálmád sierânâsišedeijee, kote parga noonâ oovtâstpargoost paargon ovdebáá nomâttum saavâjođetteijei sierânâsišedeijeiguin.
Värisaavâjođetteijee sierânâsišedeijee pargoh miärášuveh Sämitige pargo-oornig 12 § (14.4.2026 tievâsčuákkim nonnim pargo-oornig) mield. Värisaavâjođetteijee sierânâsišedeijee váldupargon lii išediđ värisaavâjođetteijee olášuttiđ pargo-oornig miäldásijd pargoid já suu ovdâsvástádâssyergin meridum pargoin, sehe toimâđ värisaavâjođetteijee raavâadeleijen já toorjân ráđádâlmijn. Lasseen värisaavâjođetteijee sierânâsišedeijee valmâštâl värisaavâjođetteijee viestâdem linjiimijd, tiäđáttâsâid já sosiaallii media peividmijd já huolât värisaavâjođetteijee äigitaavluin, čuákkim- já mätkiorniistâlmijn.
Palvâluskoskâvuođâ tiäđuh
Sämitige pargo-oornig mield värisaavâjođetteijee sierânâsišedeijee nomâttuvvoo pargosis värisaavâjođetteijee toimâpajan. II värisaavâjođetteijee sierânâsišedeijee pargo álgáččij sopâmuš mield nuuvt jotelávt ko máhđulâš já pištá 30.11.2027 räi. Toimâ lii Sämitige almos toimâttuv vuálásâš.
Pargo tevdimist nuávdittuvvoo neelji mánuppaje keččâlemäigi.
Sämitige toimâpäikki lii Säämi kulttuurkuávdáš Sajosist, Anarist, mutâ pargo lii máhđulâš porgâđ káidusin.
Occest mij vyerdip
Tohálâšvuotâvátámâššân lii hiäivulâš ollâškovlâtođhos. Lasseen váttoo sämikielâ táiđu (pargo-oornig 71.2 §). Pargo miänástuvvee hoittám váátá šiev sämikulttuur, sämipolitiik já haaldâtlij pargoi tubdâm sehe eromâš pyere kirjálii olgospyehtimtááiđu. Lasseen mij vyerdip šiev vuáruvaikuttâs-, ornijdem- já oovtâstpargotááiđuid, streesihaldâšemnaavcâid, njyebžilvuođâ sehe naavcâid toimâđ jiečânávt vättee já motomin huápulijn-uv tiilijn.
Pälkki
Pälkki miärášuvá Sämitige pälkkivuáháduv vátávâšvuotâtääsi IV/II mield (vuáđupälkki olespargoääigist 2998,97 eurod/mp). Vuáđupäälhi lasseen máksojeh 24 % sämikuávlu lase sämmilij päikkikuávlust porgâdijn já pargohárjánem mield miärášuvvee hárjánemlaseh.
Uuccâm
Uuccâmluámáttuv, sehe rijjâtátulii rijjâhámásii uuccâmreeivâ sehe máhđulii ánsuluvâttâllâm já eres lahtosijd kalga toimâttiđ Sämitige čäällimkoodán majemustáá 30.4.2026 räi taan šleđgâlii uuccâmluámáttuv peht (lekkâs uđđâ laasân):
Lasetiäđuid pargoost addel haldâttâhhovdâ Pia Ruotsala-Kangasniemi, pia.ruotsala@samediggi.fi, puh. 040 726 2688
Sämitige tooimân puáhtá uápásmuđ nettičujottâsâst www.samediggi.fi
Anarist 15.4.2026
Sämitigge
