Tuomas Aslak Juuso EMRIP-čuákkimist Genevest: sämitiggelaavâ uđâsmittem já algâaalmugij uásálistemvuoigâdvuođâ nanodem ovdedeh olmoošvuoigâdvuođâi olášume
Sämitige II värisaavâjođetteijee Tuomas Aslak Juuso uásálistij 13.-17. syeinimáánu Genevest uárnejum OA algâaalmugij vuoigâdvuođâid kieđâvuššee äššitobdeemekanism (EMRIP) ihásij čuákkimân. Sämitigge kiijtij sahâvuárustis EMRIP torjuu sämitiggelaavâ uđâsmitmist.
- EMRIP toorjâ Sämitiigán lii lamaš tehálâš lahâuđâsmittem jieškote-uv muddoin. Ton äššitubdâmuš lii nanodâm ibárdâs OA algâaalmugij vuoigâdvuođâi julgáštâsâst já ton heivitmist. Sämitiggelaavâ uđâsmittem lii merhâšittee lävkki sämmilij jiešmeridemvuoigâdvuođâ naanoodmist Suomâst, paahud Juuso.
Juuso puovtij oovdân merhâšittee tiättun čuákkimân algâaalmugij uásálistemvuoigâdvuođâ nanodem OA pargoost. Uásálistemvuoigâdvuođâst láá juksum puátuseh, mutâ pargo juátkoo ain.
- OA:st láá jo olášittum teháliih ovdánmeh algâaalmugij uásálistemvuoigâdvuođâ
naanoodmist. Tääl lii tehálâš juátkiđ pargo já algâttiđ ráđádâlmijd tast, maht algâaalmugij jieijâs ovdâstemorgaanáid puáhtá turviđ pisovâš já čielgâ máhđulâšvuođâid uásálistiđ OA olmoošvuoigâdvuotârääđi paargon. Uásálistem kalga vuáđuduđ toos, ete algâaalmugeh jieijah pyehtih leđe mieldi jieijâs valjim ovdâsteijei pehti, tiäddut Juuso sahâvuárustis.
EMRIP lii OA olmoošvuoigâdvuotârääđi vuálásâš äššitobdeeorgaan, mii tuárju staatâid já algâaalmugijd OA algâaalmugjulgáštâs olášutmist. Sämitigge ana tergâdin juátkiđ savâstâllâm já ohtsâšpargo EMRIPáin.
Tuomas Aslak Juuso
II värisaavâjođetteijee
Sämitigge
