Sämitigge teivâdij europarlamiänttárijd Renew Europe -juávhust
Sämitigge teivâdij Euroop parlament Uđâsmuvvee Euroop-juávhu (eng. Renew Europe) ovdâsteijeid Suáluičielgist njuhčâmáánu 27. peeivi uássin juávhu Suomâ kollim. Sämitiggeest teivâdmân uásálistii saavâjođetteijee Pirita Näkkäläjärvi, stiivrâ jeessân Asko Länsman, jeessân Leena Niittyvuopio-Jämsä já aalmugijkoskâsij aašij čällee Inka Saara Arttijeff.
Renew Europe -juávhu, Sämitige já RAP Säämi ovdâsteijeid Suáluičielgist 27.3. Kove: Renew Europe.
Teivâdmist savâstâllii äigikyevdilijn sämmilijd kyeskee koččâmušâin, eromâšávt EU miärádâstoohâm vaikuttâsâin sämmilij vuoigâdvuođáid, sämikieláid, luánduriggoduvváid, ärbivuáváláid iäláttâssáid já šoŋŋâdâhnubástusân vuáháduumân. Savâstâlmijn tiäduttii meid sämmilij uásálistemvuoigâdvuođâid EU:st já táárbu nanodiđ njuolgâ savâstâllâm EU-toimâorgaanij já sämmilij instituutioi kooskâ. Lasseen savâstâllii torvolâšvuođâst já varriidâtmist, moh lijjii Renew Europe -juávhu Suomâ kollim teemah.
– Lii tehálâš, ete euroopliih merideijeeh kuállejeh Säämist já uápásmuveh pääihi alne sämmilij eellimvuáhán, sämikieláid já ärbivuáváláid iäláttâssáid, iätá Sämitige saavâjođetteijee Pirita Näkkäläjärvi.
Sämitigge puovtij oovdân, ete veikâ EU njuolgâdusâin já ruttâdempiergâsijn láá merhâšittee vaikuttâsah sämmilij päikkikuávlun, te sämmilijn iä tääl lah tuárvi máhđulâšvuođah uásálistiđ EU miärádâstohâmân sijjân kyeskee aašijn.
– EU ääših láá ohtâ Sämitige taan paje váldumittomeerijn. EU vaaigut sämmilij argâpiäiván, mutâ Sämitigge ij peesâ vaiguttiđ EU miärádâstohâmân, veikâ sämmiliih láá EU kuávlu áinoo algâaalmug. Taas mij keččâlep finniđ nubástus, Näkkäläjärvi paahud.
– Sämitigge ana tehálâžžân, ete EU-merideijei kolliimeh Sáámán juátkojeh já ete savâstâllâm ovdeduvvoo meritiätulávt, juátká Näkkäläjärvi.
Savâstâlmijn kieđâvuššii meid konkreetlijd vuovijd nanodiđ sämmilij sajattuv EU:st, tego oovtâstpargo lasettem Euroop parlamentijn sehe pisovub uásálistemmekanismij ovdedem.
Euroop parlament jeessân Anna-Maja Henriksson tiäduttij savâstâllâm merhâšume.
– Lii tehálâš, ete EU:st kuldâleh sämmilij uáinuid sii jieijâs vuolgâsoojijn já nanodeh oovtâstpargo Sämitiggijn. Mun lam eromâš ilolâš tast, ete mii historjálii styeres, paijeel 20 europarlamiänttár delegaatio kollij Tave-Suomâst já teivâdij Sämitige ovdâsteijeid.
– Mun lam tiäđulávt porgâm ton oovdân, ete sämmilij jienâ kulluuččij pyerebeht meid Brysselist. Mii savâstâlmijn lâi stuorrâ vaikuttâs mii kuoimijd, já maaŋgah finnejii tääbbin fáárun ovdiist jieŋâlub ibárdâs sämmilij eellimtiilijn já tain hástusijn, maid sämmiliih kuáhtájeh taan ääigi, juátká Henriksson.
Suomâst Renew Europe -juávhust láá Suomâ ruátálâš aalmugpiäládâh (RAP) já Suomâ Kuávdáš. Euroop parlament syemmilijn jesânijn juávkun kuleh Anna-Maja Henriksson (RAP), Katri Kulmuni (Kuávdáš) já Elsi Katainen (Kuávdáš), kiäh puohah lijjii mieldi kolliimist.
Lasetiäđuh:
Inka-Saara Arttijeff
Aalmugijkoskâsij aašij čällee
050 5747629
inka-saara.arttijeff@samediggi.fi
