Säämi kielâpalhâšume Kollekielâ Nils Øivind Helanderân

Kollekielâ-palhâšume lii mieđettum emeritusprofessor Nils Øivind Helanderân (Máre Jon Nilsan) kuhes já maaŋgâpiälásii eellimpargoost sämikielâ ovdedem oovdân. Helander lii porgâm sämikielâ nanodem pyerrin iärrás lasseen Tromssa ollâopâttuvâst, Säämi ollâškoovlâst já Taažâ sämitiggeest.

Palhâšumevuáđustâsâi mield Helander lii máttáátteijen, totken já kielâäššitobden vaiguttâm merhâšitteht tavesämikielâ kielâtipšom já sämikielâlii terminologia oovdedmân. Suu pargo tiättoo meid maaŋgâi suhâpuolvâi sämikielâ áámmátlij škovliimist já kielâtiäđulâšvuođâst. Sämikielâ akatemlii kevttim oovdedmist Helander uási lii lamaš áinoošlajâsâš.

Palhâšume finnejeijee almostittui onne Helsigist Suomâ, Taažâ já Ruotâ sämiaašijn västideijee ministerij já sämitiigij saavâjođetteijei čuákkim ohtâvuođâst. Tilálâšvuođâst Sämitige oovdâst Sämitige jeessân Leena Niittyvuopio-Jämsä. Čuákkim uásálisteeh savâstillii iärrás lasseen torvolâšvuotâpirrâs nubástusâin sämmilij uáinust sehe jieškote-uv enâmij tuotâvuotâ- já sovâdâttâmprosesijn.

Kollekielâ-palhâšume láá vuáđudâm sämiaašijn Taažâst, Ruotâs já Suomâst västideijee ministereh já tai enâmij sämitiigij saavâjođetteijeeh. Palhâšume juohhui vuossâmuu tove ive 2004 já tot mieđettuvvoo jyehi nube ive. Palhâšume mieđettuvvoo ovtâskâs ulmuid tâi siärvusáid, kiäh láá toimâm ánsulávt já merhâšittee vuovvijn sämikielâ ovdedem tâi siäiludem oovdân.

Lasetiäđuh
Tuomas Aslak Juuso
II värisaavâjođetteijee
040 687 3394
tuomas.juuso@samediggi.fi