Sámi giellabálkkašupmi Gollegiella Nils Øivind Helanderii

Gollegiella-bálkašumi vuoiti Nils Øivind Helander ja Sámedikki lahttu Laura Niittyvuopio-Jämsä.

Gollegiella-bálkkašupmi lea mieđihuvvon emeritusprofessor Nils Øivind Helanderii (sámegillii Máre Jon Nilsa) guhkes ja máŋggabealat eallinbarggus sámegiela ovddideapmin. Helander lea bargan karriearas áigge sámegiela sajádaga nannema váras earret eará Romssa universiteahtas, Sámi allaskuvllas ja Sámedikkis Norgga bealde. Bálkkašupmeákkaid mielde oahpaheaddjin, dutkin ja giellaáššedovdin Helander lea váikkuhan mearkkašahtti láhkai davvisámegiela giellagáhttema ja sámegiela terminologiija ovddideapmái. Su bargu oidno maiddái máŋggaid sohkabuolvvaid sámegiela ámmátolbmuid skuvlejumis ja gielladiđolašvuođas. Sámegiela akademalaš geavaheami ovddideamis Helander bargobijus leamašan áidnalunddot.

Bálkkašumi oažžu almmustahttui odne Helssegis Suoma, Norgga ja Ruoŧa sámeáššiin vástidan ministariid ja sámedikkiid sátnejođiheaddjiid čoahkkima oktavuođas.Dilálašvuođas Sámedikki ovddasta Sámedikki lahttu Leena Niittyvuopio-Jämsä. Čoahkkimis ságastalle earret eará dorvvolašvuođabirrasa nuppástusain sámiid geahččanguovllus sihke eará riikkaid duohtavuođa- ja soabadanproseassain.

Gollegiella-bálkkašumi leat vuođđudan sámeáššiin vástidan Norgga, Ruoŧa ja Suoma ministarat ja dáid riikkaid sámedikkiid sátnejođiheaddjit. Bálkkašupmi juhkkojuvvui vuosttas geardde jagi 2004 ja dat mieđihuvvo juohke nuppi jagi. Bálkkašupmi mieđihuvvo priváhta olbmuide dahje servošiidda, mat leat ožžon ánssuid doaibmamiin mearkkašahtti vugiin sámegiela ovddideami, gárgeheami dahje seailluheami ovdii.

Lassidieđut

Tuomas Aslak Juuso
II várreságajođiheaddji
040 687 3394
tuomas.juuso@samediggi.fi