Nils Øivind Helander vuäǯǯ Kåʹllǩiõll-sääʹmǩiõllciist

Kåʹllǩiõll-cistt lij miõttum emeritusprofessor Máre Jon Nilsa – Nils Øivind Helandeera kuʹǩes da määŋgpeällsaž jieʹllemtuâjast sääʹmǩiõl oouʹdummšest. Helander lij reâuggam karriääʹres ääiʹj sääʹmǩiõl sââʹj ravveem diõtt jeeʹrbi mieʹldd Tromssa universiteeʹttest, Sääʹm õllškooulâst di Taar Sääʹmteeʹǧǧest.

Ciist miõttâmvuâđai mieʹldd Helander lij uʹčteeʹlen, tuʹtǩǩeeʹjen da ǩiõlläʹšštobddjen vaaiktam miârkteeinalla tâʹvvsääʹmǩiõl ǩiõllhuâl da sääʹmǩiõllsaž terminologia oouʹdummša. Suu tuâjj kuâsttai še määŋgi puõlvvõõǥǥi sääʹmǩiõl ämmatniiʹǩǩi škooultõõzzâst da ǩiõlltieʹttemvuõđâst. Sääʹmǩiõl akateemlaž ââʹnnem oouʹdummšest Helandeeʹr tuâjjmieʹrr lij leämmaž oʹdinaknallšem.

Cisttvuäǯǯai õlmmeeš täʹbbe Heʹlssnest Lääʹddjânnam, Ruõcc da Taar sääʹmaaʹššin vaʹstteei ministeeʹri di Sääʹmtiiʹǧǧi saaǥǥjååʹđteeʹji såbbar õhttvuõđâst. Päʹlǩǩeempoodd Sääʹmteeʹǧǧ eeʹttkõʹsttjen lij Sääʹmteeʹǧǧ vuäzzlaž Leena Niittyvuopio-Jämsä. Såbbrest saǥstõʹlleš jeeʹrbi mieʹldd staanvuõttpirrõõzz muttsin säʹmmlai ǩiõččâmkuuʹlmest di jeeʹres jânnmi tuõttvuõtt- da suåvâdvuõttproseeʹssin.

Kåʹllǩiõll-ciist miõttmõõžž lie alttääm sääʹmaaʹššin Lääʹddjânnmest, Ruõccâst da Taarâst vaʹstteei ministeeʹr di täi jânnmi Sääʹmtiiʹǧǧi saaǥǥjååʹđteei. Ciist juõʹǩǩeš vuõssvuâra eeʹjj 2004 da tõn miõđât juõʹǩǩ nuuʹbb eeʹjj. Cistt miõđât privattoummid leʹbe õutstõõzzid, kook lie reâuggam miârkteeinalla sääʹmǩiõl oouʹdeem, ooudâs viikkâm leʹbe seeiltem diõtt.

Lââʹssteâđ

Tuomas Aslak Juuso
II väärrsaaǥǥjååʹđteei
040 687 3394
tuomas.juuso@samediggi.fi