Sämitigge já Máttááttâshaldâttâs nanodii oovtâstpargos
Sämitigge já Máttááttâshaldâttâs teivâdii skammâmáánu 6. peeivi já teivâdmist savâstâllui oovtâstpargo naanoodmist sämmilii arâšoddâdem, máttááttâs já škovlim koččâmušâin. Teivâdmist soppui, ete oovtâstpargo ovdeduvvoo tienuuvt, ete tot lii tááláást merikoskâsub já vuávájuvvoo muuneeld.
Sämitige II värisaavâjođetteijee já škovlimsektor ovdâsvástádâssaavâjođetteijee Tuomas Aslak Juuso tiäddut merikoskâsii já muuneeld vuávájum oovtâstpargo merhâšume sämmilii šoddâdem já máttááttâs koččâmušâin.
Ulmen lii sooppâđ ohtsijn teivâdmijn já oovtâstpargo vuáháduvâin muuneeld ovdâmerkkân jyehi-ivvááš äigitaavlu vievâst. Návt Sämitigge puáhtá uásálistiđ olmâ äigitaavlust sämmilij máttááttâs, škovlim já arâšoddâdem valmâštâlmân. Teivâdmist identifisistii kuohtui peelij táárbu já haalu merikoskâsii oovtâstpaargon, já uásipeleh algâtteh jyehi-ivvááš oovtâstpargoteivâdmijd.
”Teivâdem tehálumos loppâpuáđus lii ohtsâš táttutile sirduđ ovtâskâs ohtâvuođâväldimijn merikoskâsii já muuneeld vuávájum oovtâstpaargon. Taat huksee vuáđu toos, ete Sämitige äššitubdâmuš váldoo vuotân jo valmâštâllâm algâmuddoost”, iätá Sämitige II värisaavâjođetteijee já škovlimsektor ovdâsvástádâssaavâjođetteijee Tuomas Aslak Juuso.
Oovtâstpargo nanoduvvoo sämmilii arâšoddâdem já máttááttâs oovdedmist
Teivâdmist kieđâvuššii Sämitige laavâst asâttum sajattuv sämimáttááttâs já -škovlim äššitobden sehe sämitiggelaavâ 9 § miäldásii ráđádâllâmkenigâsvuođâ. Ulmen lii nanodiđ olmâáigásii oovtâstpargo tienuuvt, ete Sämitige äššitubdâmuš puáhtá väldiđ vuotân máttááttâsân já arâšoddâdmân kyeskee valmâštâlmist jo proosees algâmuddoost.
Savâstâlmist ellii čoođâ meid Sämikielâi já sämikielâlii máttááttâs ovdedempargojuávhu loppâraapoort toimâiävtuttâsâid, maid Sämitigge já Máttááttâshaldâttâs pyehtih ovdediđ oovtâst. Merhâšitten oovtâstpargosyergin identifisistii eromâšávt máttááttâsvuávámpargo, arâšoddâdemvuávám ovdedem já sämmilii arâšoddâdem pedagogisijd linjiimijd sehe sämikielâlijd oppâmaterialijd já sämmilâštiäđu nanodem oppâmaterialijn.
Sämitigge já Máttááttâshaldâttâs juátkih oovtâstpargo keevâtlij ráhtusij já äigitaavlui valmâštâllâm. Ulmen lii pisovâš já merikoskâsâš oovtâstpargo, mon vievâst puáttee uđâsmitmijd, valmâštâllâmhaavâid, máttááttâsvuávám- já arâšoddâdemvuávámpargo sehe oppâmaterialtáárbuid puáhtá tarkkuđ muuneeld.
Teivâdem uárnejui hybriditeivâdmin. Máttááttâshaldâttâsâst teivâdmân uásálistijn uáivihovdâ Kurt Torsell já šoddâdem, škovlim já mättim -uásáduv hovdâ Virve Jämsén. Sämitiggeest teivâdmân uásálistii II värisaavâjođetteijee já škovlimsektor ovdâsvástádâssaavâjođetteijee Tuomas Aslak Juuso, II värisaavâjođetteijee sierânâsišedeijee Minna Näkkäläjärvi, škovlimaašij sierânâsäššitobdee Bigga-Helena Magga, oppâmaterialij sierânâsäššitobdee sajasâš Katja Semenoff, arâšoddâdemaašij sierânâsäššitobdee Anni Koivisto, sämmilii arâšoddâdempedagogiik sierânâsäššitobdee Niina Aikio-Siltala já juridisâš sierânâsäššitobdee Kalle Varis.
Lasetiäđuh
Tuomas Aslak Juuso
II värisaavâjođetteijee
040 687 3394
tuomas.juuso@samediggi.fi
Bigga-Helena Magga
škovlimaašij sierânâsäššitobdee
040 570 2786 / 010 839 3121
bigga-helena.magga@samediggi.fi
