Sääʹmteʹǧǧ da Mättʼtõshalltõs raaʹvee õhttsažtuâjas
Sääʹmteʹǧǧ da Mättʼtõshalltõs vuõinnlõʹtte 6. skamm-mannust da saǥstõʹlle õhttsažtuâj raavummšest sääʹm ouddpeâmm, mättʼtõõzz da škooultõõzz kõõččmõõžžin. Vuõinnlõõttmõõžžâst suõʹppeš õhttsažtuâj ooudummšest ânnʼjõõžž mieʹrrkõskksubun da ouddkõsttjen.
Sääʹmteeʹǧǧ II väärrsaaǥǥjååʹđteeʹjj da škooultõs-sektoor vasttõs-saaǥǥjååʹđteeʹjj Tuomas Aslak Juuso teäddad mieʹrrkõskksa da ouddkõõʹsti õhttsažtuâj miârktõõzz sääʹm peâmmʼmõõžž da mättʼtõõzz kõõččmõõžžin.
Täävtõssân lij suåppâd õhttsaž vuõinnlõõttmõõžžin da õhttsažtuâj vuõʹjjin ooudbeäʹlnn ouddmiârkkân eeʹǩǩčiâss veäkka. Nääiʹt Sääʹmteʹǧǧ vuäitt vuässõõttâd vuõiggäiggsânji sääʹm mättʼtõõzz, škooultõõzz da ouddpeâmm kuõskki valmštõõllmõʹšše. Vuõinnlõõttmõõžžâst tuõʹtteš kuhttuibeällsaž taarb da haall mieʹrrkõskksaž õhttsažtuõjju, da vueʹssbeäʹl alttee piiri-iiʹjji šõddi õhttsažtuâjjvuõinnlõõttmõõžžid.
”Vuõinnlõõttmõõžž vääžnmõs lopp-puʹhttõs lij õhttsaž tättsââʹjj serddjed måttmin jeeʹrab õhttvuõđvälddmõõžžin mieʹrrkõskksaž da ouddkõʹstti õhttsažtuõjju. Tät rääjj vuâđ tõõzz, što Sääʹmteeʹǧǧ äʹšštobddmõš vääʹldet lokku juʹn valmštõõllmõõžž alggpââʹjest”, särnn Sääʹmteeʹǧǧ II väärrsaaǥǥjååʹđteeʹjj da škooultõs-sektoor vasttõs-saaǥǥjååʹđteeʹj Tuomas Aslak Juuso.
Õhttsažtuâj raaveet sääʹm ouddpeâmm da mättʼtõõzz ooudâsviikkmõõžžâst
Vuõinnlõõttmõõžžâst ǩiõttʼtõʹlleš Sääʹmteeʹǧǧ lääʹjjmeâldlaž sââʹj sääʹm-mättʼtõõzz da -škooultõõzz äʹšštobddjen di sääʹmteʹǧǧlääʹjj 9 § meâldlaž saǥstõõllâmõõlǥtõõzz. Täävtõssân lij raaveed vuõiggäiggsaž õhttsažtuâj nuʹt, što Sääʹmteeʹǧǧ äʹšštobddmõš vueiʹtet väʹldded lokku mättʼtõõzz da ouddpeâmm kuõskki valmštõõllmõõžžâst juʹn proseeʹssi alggpââʹjest.
Saǥstõõllmõõžžâst jiõʹlleš čõõđ še Sääʹmǩiõli da sääʹmǩiõllsa mättʼtõõzz oouʹdeemtuâjj-joouk lopprapoort tåimmeʹtǩǩõõzzid, koid Sääʹmteʹǧǧ da Mättʼtõshalltõs vueiʹtte oouʹdeed õõutsââʹjest. Kõskksiʹžžen õhttsažtuâjjvuʹvdden toobdsteš jeäʹrben mättʼtõsplaantuâjj, ouddpeâmmplaan ooudâsviikkmõš da sääʹm ouddpeâmm pedagooglaž liʹnjjʼjõõzz di sääʹmǩiõllsa mättmateriaal da sääʹmteâđ raavummuš mättmateriaalin.
Sääʹmteʹǧǧ da Mättʼtõshalltõs juäʹtǩǩe õhttsažtuâj vueʹjj rajjsi da äiʹǧǧtaauli valmštõõllmõõžž. Täävtõssân lij põõšši da mieʹrrkõskksaž õhttsažtuâjj, koon veäkka puõʹtti oođummšid, valmštõõllâmhaʹŋǩǩõõzzid, mättʼtõsplaan- da ouddpeâmmplaaneemtuâj di mättmateriaaltaarbid vueiʹtet taʹrǩstõõllâd juʹn ooudbeäʹlnn.
Vuõinnlõõttmõõžž jäʹrjsteš hybridvuõinnlõõttmõššân. Mättʼtõshalltõõzzâst vuõinnlõõttmõʹšše vuässõʹtte väʹlddjååʹđteeʹjj Kurt Torsell da peâmmʼmõš, škooultõs da silttummuš -juâkkaz jååʹđteeʹjj Virve Jämsén. Sääʹmteeʹǧǧest vuõinnlõõttmõʹšše vuässõʹtte II väärrsaaǥǥjååʹđteeʹjj da škooultõs-sektoor vasttõs-saaǥǥjååʹđteeʹjj Tuomas Aslak Juuso, II väärrsaaǥǥjååʹđteeʹj sueʹrǧǧäʹšštobddi Minna Näkkäläjärvi, škooultõsaaʹšši sueʹrǧǧäʹšštobddi Bigga-Helena Magga, mättmateriaali sueʹrǧǧäʹšštoobdi sâjjsaž Katja Semenoff, ouddpeâmm sueʹrǧǧäʹšštobddi Anni Koivisto, sääʹm ouddpeâmmpedagogiikk sueʹrǧǧäʹšštobddi Niina Aikio-Siltala di juriidlaž sueʹrǧǧäʹšštobddi Kalle Varis.
Lââʹssteâđaid vuäǯǯak
Tuomas Aslak Juuso
II väärrsaaǥǥjååʹđteeʹjj
040 687 3394
tuomas.juuso@samediggi.fi
Bigga-Helena Magga
škooultõsaaʹšši sueʹrǧǧäʹšštobddi
040 570 2786 / 010 839 3121
bigga-helena.magga@samediggi.fi
