Sámediggi ja Oahpahusráđđehus nanosmahttet ovttasbargguset
Sámediggi ja Oahpahusráđđehus deaivvadedje skábmamánu 6. beaivve vai besse ságastallat ovttasbarggu nanosmahttimis gažaldagain, mat laktásit sámi árrabajásgeassimii, oahpahussii ja skuvlejupmái. Deaivvadeamis sohppojuvvui, ahte ovttasbargu ovddiduvvo nu, ahte dat lea jeavddalut ja das plánejuvvojit áššit buorebut ovddalgihtii go dán rádjai.
Sámedikki II várreságajođiheaddji ja skuvlensektora vástoságajođiheaddji Tuomas Aslak Juuso deattuha jeavddalaš ja ovddalgihtii plánejuvvon ovttasbarggu mearkkašumi sámi bajásgeassima ja oahpahusa gažaldagain.
Mihttomearrin lea soahpat oktasaš deaivvademiin ja ovttasbarggu geavadagain ovddalgihtii ovdamearkka dihte jahkeáigeplána bokte. Ná Sámediggi sáhttá oassálastit rivttes áigásaččat sámiid oahpahussii, skuvlejupmái ja árrabajásgeassimii guoski válmmaštallamii. Deaivvadeamis gávnnahuvvui ahte guktuin oassebeliin lea dárbu ja dáhttu jeavddalaš ovttasbargui, ja oassebealit álggahit jahkásaš ovttasbargodeaivvademiid.
”Deaivvadeami dehálamos loahppaboađus lea oktasaš dáhttu sirdásit ovttaskas oktavuođaváldimiin jeavddalaš ja ovddalgihtii plánejuvvon ovttasbargui. Dát hukse vuođu dasa, ahte Sámedikki áššedovdámuš vuhtiiváldojuvvo juo válmmaštallama álgomuttus”, dadjá Sámedikki II várreságajođiheaddji ja skuvlensektora vástoságajođiheaddji Tuomas Aslak Juuso.
Ovttasbargu nanosmahttojuvvo sámi árrabajásgeassima ja oahpahusa ovddideamis
Deaivvadeamis gieđahallojuvvui Sámedikki lágas ásahuvvon sajádat sámeoahpahusa ja -skuvlejumi áššedovdin ja sámediggelága 9 §:s oaivvilduvvon ráđđádallangeatnegasvuohta. Mihttomearrin lea nanosmahttit rivttes áigásaš ovttasbarggu dan láhkai, ahte Sámedikki áššedovdámuša sáhttá vuhtiiváldit oahpahussii ja árrabajásgeassimii guoski válmmastallamis juo proseassa álgomuttus.
Ságastallamis gieđahallojuvvojedje maiddái sámegielaid ja sámegielat oahpahusa ovddidanbargojoavkku loahpparaportta doaibmabidjoevttohusat, maid Sámediggi ja Oahpahusráđđehus sáhttet ovttas ovddidit. Dehálaš ovttasbargosuorgin dovdájuvvojedje erenomážit oahppoplánabargu, árrabajásgeassima ovddideapmi ja sámi árrabajásgeassima pedagogalaš linnjemat ja maid sámegielat oahppamateriálat ja sámedieđu nannen oahppamateriálain.
Sámediggi ja Oahpahusráđđehus jotket ovttasbarggu geavatlaš ráhkadusaid ja áigeplánaid válmmaštallama. Mihttomearrin lea bissovaš ja jeavddalaš ovttasbargu, man bokte boahttevaš ođastusaid, válmmaštallanprošeavttaid, oahppoplána- ja árrabajásgeassinplánabarggu ja oahppamateriáladárbbuid sáhttá guorahallat ovddalgihtii.
Deaivvadeapmi ordnejuvvui hybridadeaivvadeapmin. Oahpahusráđđehusas deaivvadeapmái oassálasttiiga oaivehoavda Kurt Torsell ja bajásgeassin, skuvlen ja máhttu -ossodaga hoavda Virve Jämsén. Sámedikkis deaivvadeapmái oassálaste II várreságajođiheaddji ja skuvlensektora vástoságajođiheaddji Tuomas Aslak Juuso, II várreságajođiheaddji erenoamášveahkkebargi Minna Näkkäläjärvi, skuvlenáššiid erenoamášáššedovdi Bigga-Helena Magga, oahppamateriálaid erenoamášáššedovdi sadjásaš Katja Semenoff, árrabajásgeassima erenoamášáššedovdi Anni Koivisto, sámi árrabajásgeassinpedagogihka erenoamášáššedovdi Niina Aikio-Siltala ja juridihkalaš erenoamášáššedovdi Kalle Varis.
Lassidieđut
Tuomas Aslak Juuso
II várreságajođiheaddji
040 687 3394
tuomas.juuso@samediggi.fi
Bigga-Helena Magga
skuvlenáššiid erenoamášáššedovdi
040 570 2786 / 010 839 3121
bigga-helena.magga@samediggi.fi
