Sämitigge nomâttij jesânijd Laapi pyereestvaijeemkuávlu sämikielâ lävdikoodán valjâpajan 2025-2029
Sämitige čuákkim 2/2025 tollui cuáŋuimáánu 14. peeivi 2025 káidusohtâvuođáin. Sämitigge nomâttij čuákkimist Laapi pyereestvaijeemkuávlu sämikielâ lävdikoodán vittâ jeessân já sijjân persovnlijd värijesânijd. Eres aašij lasseen čuákkim kuulâi Sämmiliih kirhoost –haavâ äššitobdeid.
Sämitige ornijdemčuákkim 23.9.2024. Kove: Ville Fofonoff.
Sämitigge nomâttij Laapi pyereestvaijeemkuávlu sämikielâ lävdikoodán čuávuváid jesânijd já sijjân persovnlijd värijesânijd.
- Iiris Kangas, värijeessân Saammâl Morottaja
- Inga Äärelä, värijeessân Marjo Magga
- Aslak Pieski, värijeessân Markku Porsanger
- Anne-Maria Näkkäläjärvi, värijeessân Tuomas Aslak Juuso
- Tinja Semenoff, värijeessân Tauno Ljetoff.
Sämitige čuákkim vaaldij huámmášumán noomâtmist sämmilij kielâlijd já kuávlulijd juávhuid sehe Laapi pyereestvaijeemkuávlu pivdem mield pyereestvaijeemkuávlu 76 § miäldásii valjâtohálâšvuođâ sehe täsiárvulaavâ 4 a §.
Sämikielâ lävdikode pargon lii:
1) selvâttiđ, árvuštâllâđ já celkkiđ tast, maht kuávluváldustiivrâ miärádâsah vaigutteh kielâlij vuoigâdvuođâi keevâtlii olášumán;
2) selvâttiđ, árvuštâllâđ já miäruštâllâđ tai palvâlusâi táárbu, maid pyereestvaijeemkuávlu fáálá ucceeblohokielân já čuávvuđ tai palvâlusâi finnim já kvaliteet;
3) čielgiittâsâi, árvuštâllâm já čuávvum vuáđuld toohâđ kuávlustiivrân avžuuttâsâid kielâucceeblovo palvâlusâi já palvâluskuálusij ovdedemtooimâi várás sehe pargei kielâtáiđuvátámâššân já kielâtááiđu pyeredem várás.
Sämmiliih kirhoost –haavâ äigikyevdileh ääših tiättun čuákkimist
Sämitige čuákkim kuulâi äššitobden Mari Valjakka já Erva Niittyvuopio Sämmiliih kirhoost –haavâst. Sämmiliih kirhoost -haahâ olášuttui Suomâ evaŋgellâš-luterlii kirhoost iivij 2023-2024. Haahâ jotkui vyesimáánu 2025 loopâ räi, vâi puávtáččii olášuttiđ haavâst rahtum antologia, lopâttemseminaarijd já juhlemeesu. Haavâ lopâttemtilálâšvuođah lijjii Hettaast 23.3.2025 já Anarist 24.3.2025. Juhlemessun olášuttemnáál soovâdvuođâ taho tuálloo Turku tuámukirhoost 8.5.2025.
Sämitige čuákkim meridij lasseen Sämitige almostorjuu budjetiävtuttâsâst ihán 2026, tärhistij Sämitige pälkkinjuolgâdus já toolâi vuolgâttemsavâstâllâm kaavaamist já eennâmkevttimhaavâin sämmilij kulttuurân šaddee vaikuttâsâi árvuštâllâm ovdedem várás.
Sämitige čuákkimij pevdikirjeh almostittojeh dokumentpaaŋkist.
Lasetiäđuh:
Tuomas Aslak Juuso
Saavâjođetteijee sajasâš
040 687 3394
tuomas.juuso@samediggi.fi
Leo Aikio
I värisaavâjođetteijee
040 621 6505
leo.aikio@samediggi.fi
