Sämitige EU-vaikuttem ovdán
Sämitigge lii loppâive 2025 nanodâm vaikuttempargos Euroop unionist kyevti merhâšittee olesvuođâ peht: kolliistâlmáin Euroop parlament olesčuákkimohhoost Strasbourgist já uásálistmáin Sámi Indigenous Summit -tábáhtusân Brysselist.
EU-vaikuttem lii Sämitige taan valjâpaje kuávdášumos aalmugijkoskâsâš njunošäšši. Vaikuttempargoost oovdân pajaneh nubijdis lohtâseijee äššin sämmilij uásálistem- ja ovdâstemvuoigâdvuođâi nanodem, šoŋŋâdâhnubástus já sämmilij táárbui miäldásiih ruttâdemčuávduseh.
Lekkâm já paaneelsavâstâllâm kuávdášliih uásálisteeh ohtsâškooveest. Kove: Barents euroarktâsâš rääđi.
Strasbourg kolliistâllâm 24.–26.11.2025 vuájui sämmilij uásálistem- ja ovdâstemvuoigâdvuođâi naanoodmân EU:st, sämmilij vuoigâdvuođâi oinum lasseetmân poolitlijn prosesijn ja EU-ruttâdemmáhđulâšvuođâi tarkkuumân. Savâstâlmijn pajanii oovdân eromâšávt šoŋŋâdâhnubástus vaikuttâsah sämikuávlust já ärbivuáválijn iäláttâsâin sehe tárbu väldiđ huámmášumán taid vaikuttâsâid EU puátteevuođâ politiikist ja ruttâdemraamijn.
Sämitigge teeivâi kolliistâllâm ääigi Euroop parlament virgeolmoošnjunošijd já syemmilijd europarlamiänttárijd. Kolliistâllâm nanodij Sämitige sajattuv aktiivlâžžân já oskottettee tuáimen EU-tääsi savâstâlmijn. Sämitige kolliistâlmist ovdâstij aalmugijkoskâsij aašij čällee Inka Saara Arttijeff.
Brysselist 9.–10.12.2025 uárnejum Sámi Indigenous Summit -tábáhtusâst čokkânij juávkku EU-merideijeeh, virgeulmuuh já algâaalmugtuáimeeh. Tábáhtusâst kieđâvuššii arktâsii kuávlu torvolâšvuotâ- já geopooliitlii tile sämmilij uáinust, šoŋŋâdâhnubástus já ruánáá sirdâšume vaikuttâsâid sämikuávloid sehe sämmilij uásálistem pirâspolitiikân. Lasseen suogârdâllii ekonomâlii ovdánem, oovtâstpargo raajij rasta já EU-ruttâdem merhâšume sämmilij siärváduvâi já iäláttâsâi naanoodmist.
Tábáhtusâst pajedii tehálâžžân äššin oovdân, ete sämmilij pisovâš ovdâstus EU:st já FPIC-prinsiip čannee já meritiätulâš olášuttem láá iävtuh toos, ete EU šoŋŋâdâh-, pirâs- já ekonomiapolitiik puáhtá leđe tuođâi vuoigâlâš já kunnijâttiđ algâaalmugij vuoigâdvuođâid. Sämitiggeest tábáhtusân uásálistijn saavâjođetteijee sajasâš Tuomas Aslak Juuso já aalmugijkoskâsij aašij čällee Inka Saara Arttijeff.
– Šoŋŋâdâhnubástus ij lah sämmilijd puátteevuođâ uhke, peic taan ääigi tuotâvuotâ. Tondiet lii velttidmettum, ete EU šoŋŋâdâh- já ruttâdempolitiikist tubdâsteh algâaalmugij eromâšsajattuv já torvejeh puigâ máhđulâšvuođâid uásálistiđ miärádâstohâmân, Sämitige saavâjođetteijee sajasâš Tuomas Aslak Juuso paahud.
Oleslâžžân Strasbourg já Bryssel savâstâlmeh čäittih, ete EU:st lii lasaneijee perustume nanodiđ EU áinoo algâaalmug sajattuv, uásálistemvuoigâdvuođâid sehe väldiđ huámmášumán šoŋŋâdâhnubástus já ruttâdem stuorrâ merhâšume sämmilij vuoigâdvuođâi olášumán. Sämitigge juátká meritiätulii EU-vaikuttempargo tai teemai ovdedem oovdân uássin valjâpaje kuávdášlii aalmugijkoskâsii strategias.
Lasetiäđuh:
Tuomas Aslak Juuso
Saavâjođetteijee
040 687 3394
tuomas.juuso@samediggi.fi
Inka Saara Arttijeff
Aalmugijkoskâsij aašij čällee
050 574 7629
inka-saara.arttijeff@samediggi.fi
