Sämitigge asâttij kulmâ uđđâ lävdikode nanodiđ sämmilij jiešhaldâšem kuávdáš toimâsuorgijn
Sämitigge asâttij čuákkimist 3/2026 uđđâ pargo-oornig mield kulmâ uđđâ lävdikode loppâ valjâpajan. Arâšoddâdemlävdikodde, aalmugijkoskâsij algâaalmug- já EU-aašij lävdikodde já tutkâmeettisâš rääđi västideh kuávdáš toimâsuorgij valmâštâlmist já oovdedmist sehe nanodeh sämmilij kielâlij já kulttuurlij vuoigâdvuođâi olášume.
Suomâ Sämitigge finnij čuákkimpuudâ ääigi aalmugijkoskâsijd kuosijd. Kooveest jesâneh Anni Koivisto, Armi Palonoja, Marjaana Aikio, Tauno Ljetoff, saavâjođetteijee Pirita Näkkäläjärvi, OA algâaalmugij vuoigâdvuođâi äššitobdeemekanism (EMRIP) värisaavâjođetteijee Sheryl Lightfoot (anishinaabe), OA algâaalmugaašij pisováá foorum (UNPFII) saavâjođetteijee Aluki Kotierk (inuiit) sehe jesâneh Inka Musta já Anu Avaskari. Kove: Pia Ruotsala-Kangasniemi, Sämitigge.
Lävdikuudij jeessânvaljiimist lii valdum vuotân sämmilij kielâlâš já kuávlulâš ovdâstus sehe jesânij šiev äššitubdâmuš jieijâs toimâsyergist. Saavâjođetteijee Pirita Näkkäläjärvi lii tuđâvâš uđđâ lävdikuddijd.
– Mun lam ilolâš tast, ete nuuvt maŋgâ sämmilii aalmuglâšsiärvus jeessân sehe Sämitige jeessân já värijeessân vuolgij mieldi uđđâ lävdikuddijd. Arâšoddâdemlävdikoddeest lii tehálâš pargo sehe eenikielâlij já kielâpiervâlpárnái kielâ paijeentolâmist já oovdedmist. Lasseen mun ilodâm nuorâi stuorrâ meereest aalmugijkoskâsij algâaalmug- já EU-aašij lävdikoddeest, vâi sii jienâ piäsá kulluđ eereeb iärrás algâaalmug- já olmoošvuoigâdvuotâaašijn, iätá saavâjođetteijee Pirita Näkkäläjärvi.
Näkkäläjärvi väljejui tutkâmeettisii rääđi saavâjođetteijen.
– Tutkâmeettisâš rääđi, mon saavâjođetteijee mun lam, parga aldasii oovtâstpargo sämitotkeiguin já akatemiain vijđásubbooht-uv eromâšávt, ko mij uđâsmitškyettip munemietâmâšâi mieđettemproosees, Näkkäläjärvi muštâl.
Arâšoddâdemlävdikodde naanood sämikielâlii arâšoddâdem
Arâšoddâdemlävdikodde västid eereeb iärrás sämmilii arâšoddâdem oovdedmist já valmâštâlmist sehe oovded sämipárnái vuoigâdvuođâid jieijâskielâlii já kulttuurmiäldásii arâšoddâdmân. Lävdikode saavâjođetteijen väljejui Leena Niittyvuopio-Jämsä já värisaavâjođetteijen Aslak Pekkala.
Arâšoddâdemlävdikode jesâneh:
Saavâjođetteijee: Leena Niittyvuopio-Jämsä (värijeessân: Aili Nuorgam)
Värisaavâjođetteijee: Aslak Pekkala (Ainomaija Mäenpää)
Jeessân: Inka-Maaria Näkkäläjärvi (Sanna Magga)
Jeessân: Katja Magga (Juha Alakorva)
Jeessân: Lávra Länsman (Mika Aikio)
Jeessân: Taina Ketola (Nils-Heikki Magga)
Jeessân: Irene Fofonoff (Teemu Titola)
Aalmugijkoskâsij algâaalmug- já EU-aašij lävdikodde oovded sämmilij vuoigâdvuođâid Euroop unionist já aalmugijkoskâsii tääsist
Lävdikode pargoid kuleh eereeb iärrás valmâštâllâđ já olášuttiđ Sämitige EU- já aalmugijkoskâsij aašij strategia já ovdediđ sämmilij uásálâšvuođâ EU toimâorgaanij miärádâstohâmist. Lävdikode saavâjođetteijen väljejui Janne Hirvasvuopio já värisaavâjođetteijen Inka Musta.
Aalmugijkoskâsij algâaalmug- já EU-aašij lävdikode jesâneh:
Saavâjođetteijee: Janne Hirvasvuopio (värijeessân: Helmi Ljetoff)
Värisaavâjođetteijee: Inka Musta (Anni-Sofia Löf)
Jeessân: Enni Similä (Tuomas Aslak Juuso)
Jeessân: Aslak Holmberg (Rosa-Máren Juuso)
Jeessân: Alisa Katajamaa (Jon-Erik Näkkäläjärvi)
Jeessân: Sárá-Márjá Keskitalo (Tiia-Káren Alakorva)
Jeessân: Joni Gauriloff (Vesa Orassalo)
Tutkâmeettisâš rääđi uđâsmit munemietâmâšproosees
Uđđâ tutkâmeettisâš rääđi oovded já kocá sämmiláid kyeskee tutkâmuš eettisij ravvui olášume já vuotân väldim sehe ovdâmerkkân meerrid siärvuslij munemietâmâšâi mieđeetmist tutkâmuššáid. Rääđi saavâjođetteijen väljejui Pirita Näkkäläjärvi já värisaavâjođetteijen Tauno Ljetoff.
Tutkâmeettisii rääđi jesâneh:
Saavâjođetteijee: Pirita Näkkäläjärvi (Värijeessân: Janne Hirvasvuopio)
Värisaavâjođetteijee: Tauno Ljetoff (Tuomas Aslak Juuso)
Jeessân: Heidi Eriksen (Leena Niittyvuopio-Jämsä)
Jeessân: Inka Musta (Marjaana Aikio)
Jeessân: Tuula-Maija Magga-Hetta (Nilla Tapiola)
Čuákkim äššilistoost meid ei. ruttâtuálulopâttem já meriruttâiävtuttâsah
Uđđâ lävdikuudij lasseen tievâsčuákkim tuhhiittij Sämitige ive 2025 ruttâtuálulopâttem já iävtuttâsâid sierâ toimâorgaanij meriruttân ihán 2028. Lasseen čuákkimist tollui livkkáás vuolgâttemsavâstâllâm Sämitige raami-iävtuttâsâst ivvijd 2028–2031. Tievâsčuákkim mieđettij meid Anni Saara Aikion iäru säämi kielârääđi jeessânvuođâst já nomâttij suu sajan Unna-Maari Pulska. Čuákkim loopâst Sämitigge tuáivuttij luho 70 ihheed tiävdám kulttuurlävdikode saavâjođetteijee Anu Avaskarin šoddâmpeeivi oovdâst.
Lasetiäđuh:
Pirita Näkkäläjärvi
Saavâjođetteijee
044 753 3766
pirita.nakkalajarvi@samediggi.fi
