Sámediggi ásahii golbma ođđa lávdegotti nannet sámiid iešráđđema guovddáš doaibmasurggiin
Sámediggi ásahii čoahkkimis 3/2026 ođđa bargoortnega mielde golbma ođđa lávdegotti dálá válgabadjái. Árrabajásgeassinlávdegoddi, álbmogiidgaskasaš eamiálbmot- ja EU-áššiid lávdegoddi ja dutkanehtalaš ráđđi vástidit guovddáš doaibmasurggiid válmmaštallamis ja ovddideamis ja nannejit sámiid gielalaš ja kultuvrralaš vuoigatvuođaid ollašuvvama.
Suoma Sámediggi oaččui álbmogiidgaskasaš gussiid. Govas ovddasteaddjit Anni Koivisto, Armi Palonoja, Marjaana Aikio, Tauno Ljetoff, ságajođiheaddji Pirita Näkkäläjärvi, ON:id eamiálbmogiid vuoigatvuođaid áššedovdimekanisma (EMRIP) várreságajođiheaddji Sheryl Lightfoot (anishinaabe), ON:id eamiálbmotáššiid bissovaš foruma (UNPFII) ságajođiheaddji Aluki Kotierk (inuihta) ja ovddasteaddjit Inka Musta ja Anu Avaskari. Govva: Pia Ruotsala-Kangasniemi, Sámediggi.
Lávdegottiid lahtuin lea vuhtiiváldon sámiid gielalaš ja guvllolaš ovddasteapmi ja lahtuid buorre áššedovdámuš iežaset doaibmasurggiin. Ságajođiheaddji Pirita Näkkäläjärvi lea duđavaš ođđa lávdegottiide.
– Illudan das, ahte nu máŋga sámi álbmotservoša lahttu ja sámediggeovddasteaddji ja -várreovddasteaddji vulge mielde ođđa lávdegottiide. Árrabajásgeassinlávdegottis lea dehálaš bargu sihke eatnigielat ja giellabeassemánáid giela bajásdoallamis ja ovddideamis. Dasa lassin illudan das, ahte nuorat leat nu ollu álbmogiidgaskasaš eamiálbmot- ja EU-áššiid lavdegottis, vai sin jietna beassá gullot earret eará eamiálbmot- ja olmmošvuoigatvuohtaáššiin, dadjá ságajođiheaddji Pirita Näkkäläjärvi.
Näkkäläjärvi válljejuvvui dutkanehtalaš ráđi ságajođiheaddjin.
– Dutkanehtalaš ráđđi, man ságajođiheaddjin lean, áigu bargat lagaš ovttasbarggu sámedutkiiguin ja akademiijain viidásabbotge erenomážit, go mii álgit ođasmahttit ovdamiehtamiid mieđihanproseassa, Näkkäläjärvi muitala.
Árrabajásgeassinlávdegoddi nanne sámegiel árrabajásgeassima
Árrabajásgeassinlávdegoddi vástida earret eará sámi árrabajásgeassima ovddideamis ja válmmaštallamis ja ovddida sámiid vuoigatvuođaid iežasgielat ja kultuvrra vuhtiiváldi árrabajásgeassimii. Lávdegotti ságajođiheaddjin válljejuvvui Leena Niittyvuopio-Jämsä ja várreságajođiheaddjin Aslak Pekkala.
Árrabajásgeassinlávdegotti lahtut:
Ságajođiheaddji: Leena Niittyvuopio-Jämsä (várrelahttu: Aili Nuorgam)
Várreságajođiheaddji: Aslak Pekkala (Ainomaija Mäenpää)
Lahttu: Inka-Maaria Näkkäläjärvi (Sanna Magga)
Lahttu: Katja Magga (Juha Alakorva)
Lahttu: Lávra Länsman (Mika Aikio)
Lahttu: Taina Ketola (Nils-Heikki Magga)
Lahttu: Irene Fofonoff (Teemu Titola)
Álbmogiidgaskasaš eamiálbmot- ja EU-áššiid lávdegoddi ovddida sámiid vuoigatvuođaid Eurohpa uniovnnas ja álbmogiidgaskasaš dásis
Lávdegotti bargguide gullá earret eará válmmaštallat ja ollašuhttit Sámedikki EU- ja álbmogiidgaskasaš áššiid strategiija ja ovddidit sámiid searvevuođa EU doaibmaorgánaid mearrádusbargamis. Lávdegotti ságajođiheaddjin válljejuvvui Janne Hirvasvuopio ja várreságajođiheaddjin Inka Musta.
Álbmogiidgaskasaš eamiálbmot- ja EU-áššiid lávdegotti lahtut:
Ságajođiheaddji: Janne Hirvasvuopio (várrelahttu: Helmi Ljetoff)
Várreságajođiheaddji: Inka Musta (Anni-Sofia Löf)
Lahttu: Enni Similä (Tuomas Aslak Juuso)
Lahttu: Aslak Holmberg (Rosa-Máren Juuso)
Lahttu: Alisa Katajamaa (Jon-Erik Näkkäläjärvi)
Lahttu: Sárá-Márjá Keskitalo (Tiia-Káren Alakorva)
Lahttu: Joni Gauriloff (Vesa Orassalo)
Dutkanehtalaš ráđđi ođasmahttá ovdamiehtanproseassa
Ođđa dutkanehtalaš ráđđi ovddida ja gohcá sámiid guoski dutkama ehtalaš rávvagiid ollašuvvama ja vuhtiiváldima ja ovdamearkka dihte mearrida searvvušlaš ovdamiehtamiid mieđiheamis dutkamuššii. Ráđi ságajođiheaddjin válljejuvvui Pirita Näkkäläjärvi ja várreságajođiheaddjin Tauno Ljetoff.
Dutkanehtalaš ráđi lahtut:
Ságajođiheaddji: Pirita Näkkäläjärvi (várrelahttu: Janne Hirvasvuopio)
Várreságajođiheaddji: Tauno Ljetoff (Tuomas Aslak Juuso)
Lahttu: Heidi Eriksen (Leena Niittyvuopio-Jämsä)
Lahttu: Inka Musta (Marjaana Aikio)
Lahttu: Tuula-Maija Magga-Hetta (Nilla Tapiola)
Čoahkkima áššelisttus leat maiddái ee. ruhtadoalloloahpaheapmi ja mearreruhtaevttohusat
Ođđa lávdegottiid lassin dievasčoahkkin dohkkehii Sámedikki jagi 2025 ruhtadoalloloahpaheami ja evttohusaid sierra doaibmasurggiid mearreruhtan jahkái 2028. Dasa lassin čoahkkimis lei ealas sáttaságastallan Sámedikki rápmaevttohusas jagiide 2028–2031. Dievasčoahkkin mieđihii maiddái Anni Saara Aikioi earu sámi giellaráđi lahttovuođas ja nammadii su sadjái Unna-Maari Pulska. Čoahkkima lohppii Sámediggi sávai lihku kulturlávdegotti ságajođiheaddji Anu Avaskarii 70-jagiávvubeaivvi ovddas.
Lassidieđut:
Pirita Näkkäläjärvi
Ságajođiheaddji
044 753 3766
pirita.nakkalajarvi@samediggi.fi
