Sämitigge lasseet resursijd párnáid já nuoráid: uđđâ arâšoddâdemlävdikodde já fastâ virge tuárjuh ovdedempargo
Sämitigge lii lasettâm resursijd párnáid já nuoráid vuáđđudmáin arâšoddâdemlävdikode já uđđâ fastâ arâšoddâdem sierânâsäššitobdee virge. Uđđâ ráhtusij ulmen lii nanodiđ sämipárnái máhđulâšvuođâid jieijâskielâlii já ollâ tääsi arâšoddâdmân sehe tuárjuđ sämikielâi já -kulttuur sirdâšum puáttee suhâpuolváid.
Arâšoddâdemlävdikodde čokkân vuossâmuu tove Anarist 26.8.2026. Kooveest čižetpeln: Irene Fofonoff (jeessân), Niina Aikio-Siltala (sierânâsäššitobdee, sämmilii arâšoddâdem pedagogiik), Taina Ketola (jeessân), Anni Koivisto (sierânâsäššitobdee, arâšoddâdemääših), Leena Niittyvuopio-Jämsä (saavâjođetteijee), Aili Nuorgam (värijeessân), Aslak Pekkala (värisaavâjođetteijee), Katja Magga (jeessân) ja Lávra Länsman (jeessân). Kove: Sämitigge /Johanna Alatorvinen.
Uđđâ arâšoddâdemlävdikode pargon lii nanodiđ sämmilii arâšoddâdem sajattuv já ovdedem. Lävdikodde asâttui Sämitige tievâsčuákkimist 17.6.2026. Arâšoddâdemlävdikode saavâjođetteijen tuáimá Sämitige jeessân Leena Niittyvuopio-Jämsä Ucjuuvâst já värisaavâjođetteijen Sämitige jeessân Aslak Pekkala Anarist. Eres jesânij já värijesânij noomah kávnojeh taan artikkâl loopâst.
Sämitige čuákkim meridij uđđâ fastâ arâšoddâdemaašij sierânâsäššitobdee virge vuáđđudmist tievâsčuákkimist 14.4.2026 pargo-oorniguđâsmittem ooleest. Virge lâi áávus njuhčâ-vyesimáánu ääigi já Sämitige stivrâ valjij viirgán Anni Koivisto čuákkimist 22.6.2026. Koivisto lii algâttâm virgeest porgemáánust 2026. Uđđâ virge vuáđudem lii máhđulâš sämitiggelaavâ vuáđuld finnejum ruttâdem vievâst.
Kyehti äššitobdee tuárjumin sämmilii arâšoddâdem ovdedem
Uđđâ virge mield Sämitiggeest toimâv kyehti sierânâsäššitobdee arâšoddâdem ooleest.
Arâšoddâdemaašij sierânâsäššitobdee Anni Koivisto kuávdáš pargon lii arâšoddâdempalvâlusâi turvim já staatâtorjui haldâšem. Sämmilii arâšoddâdem pedagogiik sierânâsäššitobdee Niina-Aikio Siltala pargoh lohtâseh arâšoddâdem pedagogiikân.
Orniistâllâm pyereed Sämitige máhđulâšvuođâid faallâđ pedagogisii torjuu sehe eenikielâlij párnái arâšoddâdem já kielâpiervâltooimâ tárboid.
Ulmen nanosub sämmilâš arâšoddâdem
Sämitige arâšoddâdemlävdikodde oovded sämmilij párnái vuoigâdvuođâid jieijâskielâlii arâšoddâdmân, valmâštâl Sämitige uáivilalmottâsâid já iävtuttâsâid sehe västid sämikielâlii arâšoddâdem já kielâpiervâltooimâ staatâtorjui kieđâvušmist, čuávumist já haaldâšmist.
– Arâšoddâdem kalga leđe noonâ toorjâ pärniperruid sämikielâi já -kulttuur sirdâšuumeest. Sämmilii arâšoddâdem kalga ovdediđ meritiätulávt tienuuvt, ete jyehi sämmilâš páárnáš finnee arâšoddâdem, mii tuárju párnáá kulttuur já kielâpálgá puoh pyeremusávt. Uđđâ lävdikodde addel mijjân ovdiist pyerebijd máhđulâšvuođâid väldiđ vuotân nuuvt eenikielâlij párnái arâšoddâdem ko meid kielâpiervâltooimâ táárbuid, mutâ oovded taid ohtân olesvuottân, iätá arâšoddâdemlävdikode saavâjođetteijee Leena Niittyvuopio-Jämsä.
Valjâpaje toimâohjelmist láá miäruštâllum arâšoddâdmist tiäduttum ääših
Sämitige valjâpaje kuávdáš ulmeh arâšoddâdmist láá ei. sämikielâlii arâšoddâdemškovlim lasettem, sämikielâlij pedagogisij linjiimij rähtim, sehe sämikielâlij arâšoddâdempalvâlusâi turvim oles enâmist.
Eromâšávt tiäduttum äššin taan valjâpaajeest lii sämmilii arâšoddâdem ovdedem Iänuduvâst. Arâšoddâdmist lii savâstâllum kieldáin sierâ ráđádâlmijn já teivâdmijn. Sämitige ulmen lii faallâđ torjuu sehe kieldáid já perruid, vâi puoh sämikielâliih párnáá pesâččii jieijâskielâlii arâšoddâdem olán.
– Párnááh já nuorah láá mii kulttuur já kielâ puátteevuotâ. Uđđâ arâšoddâdemlävdikode já fastâ äššitobdeevirge mield mij pyehtip ovdiist pyerebeht visásmittiđ, ete ain eenâb párnáin lii máhđulâšvuotâ jieijâskielâlii já ollâ tääsi arâšoddâdmân, paahud Sämitige saavâjođetteijee Pirita Näkkäläjärvi.
Sämitigge äddee, ete sämmilii arâšoddâdem ovdedem váátá puátteevuođâst-uv pyerebijd resursijd. Sämitigge lii iävtuttâm ei. sierâ meriruuđâ arâšoddâdem materialij pyevtitmân.
Arâšoddâdmân lohtâseijee aašijn puáhtá puátteevuođâst leđe ohtâvuođâst:
Tuomas Aslak Juuso
II värisaavâjođetteijee
040 687 3394
tuomas.juuso@samediggi.fi
Anni Koivisto
Sierânâsäššitobdee, arâšoddâdemääših
044 775 6560
anni.koivisto@samediggi.fi
Niina Aikio-Siltala
Sierânâsäššitobdee, sämmilii arâšoddâdem pedagogiik
040 487 5414 / 010 839 3115
niina.aikio-siltala@samediggi.fi
Sämitige arâšoddâdemlävdikode jesâneh já värijesâneh
Jesâneh
Leena Niittyvuopio-Jämsä, saavâjođetteijee
Aslak Pekkala, värisaavâjođetteijee
Inka-Maaria Näkkäläjärvi
Katja Magga
Lávra Länsman
Taina Ketola
Irene Fofonoff
Värijesâneh
Aili Nuorgam
Ainomaija Mäenpää
Sanna Magga
Juha Alakorva
Mika Aikio
Nils-Heikki Magga
Teemu Titola
Lasetiäđuh:
Pirita Näkkäläjärvi
Saavâjođetteijee
044 753 3766
pirita.nakkalajarvi@samediggi.fi
