Sämmilâš taaiđâ já maailmkove láá pyereest uáinusist Lontoost.
Sämmilâš taaiđâ já kulttuur finnejeh uáinojeijee saje Lontoost, ko Through Our Eyes: Sámi Art and Culture (Mii čolmijguin: Sämmilâš taaiđâ já kulttuur) -čáitáldâh lekkâs áárvust onnum Somerset House -taaiđâ- já kulttuurkuávdáást. Sämitige saavâjođetteijee Pirita Näkkäläjärvi uásálist čáitálduv lekkâmij ooleest uárnejum ohjelmân Lontoost.
Kovetekstâ: Sämitige saavâjođetteijee Pirita Näkkäläjärvi Through Our Eyes: Sámi Art and Culture -čáitálduv lekkâmtilálâšvuođâst Somerset Housest Lontoost Outi Pieski Duoddariid guovddáš / Layered Realities -tyeje paaldâst. Tyeji lii čáitálduv várás tiilájum uđđâ tyeji. Kove: Alisa Katajamaa.
Through Our Eyes: Sámi Art and Culture lii vuossâmuš Stuorrâ-Britanniast uárnejum sämmilii taiđuu já kulttuur juávkkučáitáldâh. Čáitáldâh čuákkee oohtân 19 samitaiđârid pirrâ Säämi Suomâst, Ruotâst já Taažâst já oovdânpuáhtá eereeb iärrás tááláštaiđuu, čuovâkuuvijd, videoid já performanstaiđuu.
Čáitálduvâst láá tyejeh nuuvt sämmilii taiđuu oovdâstjottein ko meid tááláštaaiđârijn, eereeb iärrás Iver Jåksist, Nils-Aslak Valkeapääst, Britta Marakatt-Labbast, Marja Helanderist, Olof Marsjast ja Outi Pieskist. Čáitálduv kuraattorin lává sämmilâš kovetaaiđâr Matti Aikio já Somerset House čáitáldâhjođetteijee Cliff Lauson. Aikio lii meid Sämitige värijeessân.
”Sämmilii taiđuu já mii jieččân maailmkove halijdeh uáiniđ ain eenâb pirrâ maailm. Lii tehálâš, ete sämmiliih jiejah peesih taiđuu peht muštâliđ mii kulttuurist já pyehtiđ oovdân mijjân tehálijd koččâmušâid. Taiđuu peht puáhtá kieđâvuššâđ ovdâmerkkân kolonialism vaikuttâsâid sämmilijd já sämikulttuurân”, iätá Sämitige saavâjođetteijee Pirita Näkkäläjärvi.
Kovetekstâ: Olof Marsjan Mii Dáhpáhuvva Dáppe / What’s Happening Here? (2026) -tyeje uási. Tyeji suogârdâl sämmilij kolonialism historjá já ton vaikuttâsâid.
Čáitáldâh puáhtá sämmilij taaiđârij jieijâs uáinuid aalmugijkoskâsii aalmug uáinimnáál. Tuojijn kieđâvuššojeh eereeb iärrás sämmilij historjá, kolonialism já algâaalmugij vuoigâdvuođah. Siämmást čáitáldâh pyereed sämmilii taiđuu oinum aalmugijkoskâsávt já puáhtá sämmilii maailmkove oovdân taiđuu vuovijguin.
Through Our Eyes: Sámi Art and Culture lii áávus Somerset Housest Lontoost 6.11.2026–7.2.2027. Čáitáldâhân lii nuuvtá siisâpeessâm.
Lasetiäđuh:
Pirita Näkkäläjärvi
Saavâjođetteijee
044 7533 766
pirita.nakkalajarvi@samediggi.fi
